اپریل 2027 تک ڈبلیو ایچ او میچیورٹی لیول 3 حاصل کر لیں گے: مصطفیٰ کمال

وفاقی وزیر صحت مصطفیٰ کمال سے عالمی ادارۂ صحت (ڈبلیو ایچ او) کے پاکستان میں نمائندے نے ایک اہم ملاقات کی، جس میں ڈرگ ریگولیٹری اتھارٹی آف پاکستان (ڈریپ) کے لیے ڈبلیو ایچ او میچیورٹی لیول 3 (ML-3) کے حصول کی پیش رفت کا تفصیلی جائزہ لیا گیا۔ ملاقات کے دوران ڈبلیو ایچ او کے سربراہ نے پاکستان کے صحت کے شعبے میں جاری اصلاحات کے لیے وفاقی وزیر مصطفیٰ کمال کی قیادت اور عزم کو سراہا، جبکہ وفاقی کابینہ کی جانب سے پاکستان کی پہلی ‘قومی ویکسین پالیسی’ کی منظوری کو ملکی صحت کے شعبے کے لیے ایک تاریخی اور انقلابی اقدام قرار دیا۔

وفاقی وزیر صحت مصطفیٰ کمال نے ڈبلیو ایچ او کی تکنیکی معاونت کا شکریہ ادا کرتے ہوئے کہا کہ پاکستان کے لیے ڈبلیو ایچ او میچیورٹی لیول 3 کے حصول کی کوششوں میں عالمی ادارے کا تعاون انتہائی قابلِ تحسین ہے۔ انہوں نے بتایا کہ آئندہ چند روز میں تمام صوبوں کے وزرائے اعلیٰ کے ساتھ ایک اعلیٰ سطحی اجلاس منعقد کیا جائے گا، تاکہ اس ہدف کے حصول کے لیے ہونے والی پیش رفت کا جائزہ لیا جا سکے اور وفاق و صوبوں کے درمیان مؤثر ہم آہنگی کو مزید مضبوط بنایا جائے۔ مصطفیٰ کمال نے عزم کا اظہار کیا کہ پاکستان اپریل 2027 تک یہ درجہ حاصل کر لے گا، جس سے ملکی دواساز برآمدات اور عالمی مسابقتی صلاحیت میں نمایاں اضافہ ہوگا اور پاکستان کو دنیا بھر کی تقریباً 160 فارماسیوٹیکل منڈیوں تک آسان رسائی حاصل ہو جائے گی۔