ڈاکٹر آکاش کے قتل کا معاملہ؛ حیدرآباد پولیس نے اسلم بابا گروپ کے 2 مبینہ قاتل گرفتار

کراچی کے علاقے کلفٹن تین تلوار پر ہونے والی فائرنگ کے نتیجے میں قتل ہونے والے ڈاکٹر آکاش (پرکاش) کے مقدمے میں پولیس کو بڑی کامیابی ملی ہے، جہاں حیدرآباد پولیس نے کارروائی کرتے ہوئے قتل میں ملوث دو سفاک قاتلوں کو گرفتار کر لیا ہے۔ پولیس ذرائع کے مطابق، گرفتار ملزمان خطرناک “اسلم بابا گروپ” کے کارندے ہیں، جو ماضی میں بھی جرائم کی پاداش میں جیل کاٹ چکے ہیں؛ اس منظم جرائم پیشہ گروپ میں ایک لڑکی بھی سرگرم ہے۔ دوسری جانب، ڈاکٹر آکاش کی المناک موت پر پورے علاقے اور ہندو برادری میں شدید غم کی فضا برقرار ہے۔ آنجہانی ڈاکٹر کا جسدِ خاکی آخری رسومات کے لیے شمشان گھاٹ منتقل کیا گیا، جہاں ہندو برادری، عزیز و اقارب اور لواحقین کی بڑی تعداد نے شرکت کی۔ ڈاکٹر آکاش کو ان کی مذہبی روایات کے مطابق اشکبار آنکھوں کے ساتھ سپردِ آتش کر کے آخری الوداع کہہ دیا گیا، جبکہ مقتول کے لواحقین نے مجرموں کو کڑی سزا دینے کا مطالبہ کیا ہے۔