لاڑکانہ میں پولیس کی کارروائی، بدنام زمانہ منشیات فروش خاتون گرفتار

لاڑکانہ پولیس نے ولید کے علاقے میں ایک کامیاب اور بڑی کارروائی کرتے ہوئے منشیات فروشی کے نیٹ ورک کے خلاف اہم کامیابی حاصل کی ہے اور ایک بدنام زمانہ خاتون منشیات فروش کو گرفتار کر لیا ہے۔ ایس ایس پی لاڑکانہ احمد فیصل چودھری کے مطابق، گرفتار ہونے والی خاتون کی شناخت ‘مکول گروپ’ کی سرغنہ ضمیرہ مکول کے نام سے ہوئی ہے۔ پولیس نے چھاپہ مار کارروائی کے دوران ملزمہ کے قبضے سے ایک کلو گرام سے زائد اعلیٰ کوالٹی کی چرس برآمد کر کے اسے تحویل میں لے لیا ہے۔ پولیس حکام کا کہنا ہے کہ گرفتار خاتون کا پورا خاندان اس مکروہ دھندے میں ملوث ہے، ملزمہ کا شوہر نادر اور بیٹا راشد مکول بھی منشیات فروشی کے درجنوں سنگین مقدمات میں نامزد ہیں اور پہلے ہی جیل کی سلاخوں کے پیچھے بند ہیں۔

ایس ایس پی احمد فیصل چودھری نے ملزمہ کے طریقہ کار کے حوالے سے سنسنی خیز انکشاف کرتے ہوئے بتایا کہ شوہر اور بیٹے کی گرفتاری اور جیل جانے کے بعد ضمیرہ مکول نے منشیات سپلائی کا کام نہیں روکا، بلکہ وہ قانون نافذ کرنے والے اداروں کی نظروں سے بچنے کے لیے معصوم اور کم عمر بچیوں کو بطور ‘سپلائر’ استعمال کرتی تھی اور ان سے منشیات منتقل کرواتی تھی۔ پولیس نے مکول گینگ کی سرغنہ ضمیرہ کے خلاف انسدادِ منشیات ایکٹ کے تحت باقاعدہ مقدمہ درج کر لیا ہے اور اس گھناؤنے نیٹ ورک میں شامل دیگر سہولت کاروں اور منشیات خریدنے والوں کے گرد گھیرا تنگ کرنے کے لیے تفصیلی تفتیش شروع کر دی ہے۔