شہر قائد میں فلیٹ سے ایک شخص کی گلا کٹی لاش برآمد

شہرِ قائد کے علاقے بورا پیرا فلیٹس سے ایک شخص کی گلا کٹی لاش ملنے سے علاقے میں سنسنی پھیل گئی۔ واقعے کی اطلاع ملتے ہی پولیس اور امدادی ٹیمیں فوری طور پر جائے وقوعہ پر پہنچیں اور لاش کو تحویل میں لے کر ضروری ضابطے کی کارروائی اور پوسٹ مارٹم کے لیے سول ہسپتال منتقل کیا۔ پولیس حکام کے مطابق متوفی کی شناخت 34 سالہ مصطفیٰ کے نام سے ہوئی ہے، جو غیر شادی شدہ تھا اور اس کے والد پیشے کے لحاظ سے قصائی ہیں۔

ابتدائی تحقیقات اور پولیس کے بیان کے مطابق، متوفی مصطفیٰ کا ذہنی توازن درست نہیں تھا اور وہ شدید نشے کا عادی بھی تھا۔ پولیس حکام نے انکشاف کیا ہے کہ حالات اور شواہد سے معلوم ہوتا ہے کہ متوفی نے مبینہ طور پر گھر میں موجود چھری سے اپنا ہی گلا کاٹ کر زندگی کا خاتمہ کیا۔ پولیس نے جائے وقوعہ سے شواہد اکٹھے کرنے کے بعد واقعے کی تفتیش شروع کر دی ہے تاکہ موت کے دیگر ممکنہ پہلوؤں کا بھی باریک بینی سے جائزہ لیا جا سکے۔