واشک میں مسلح افراد کی فائرنگ سے 5 افراد جاں بحق

بلوچستان کے ضلع واشک میں پاک-ایران سرحد کے قریبی علاقے ماشکیل میں نامعلوم مسلح افراد کی اندھا دھند فائرنگ کے نتیجے میں 5 مزدور جاں بحق ہو گئے۔ ڈپٹی کمشنر واشک مجید سرپرہ کے مطابق، یہ افسوسناک واقعہ ماشکیل بازار میں پیش آیا جہاں دہشت گردوں نے دکانوں پر کام کرنے والے نہتے افراد کو نشانہ بنایا اور کارروائی کے بعد فرار ہو گئے۔ سیکیورٹی ذرائع کا کہنا ہے کہ اس بزدلانہ حملے میں جاں بحق ہونے والے تمام مزدوروں کا تعلق پنجاب سے ہے۔ وزیرِ اعلیٰ بلوچستان کے معاون برائے سیاسی و میڈیا امور شاہد رند نے واقعے کی شدید مذمت کرتے ہوئے شفاف تحقیقات اور ملزمان کی فوری گرفتاری کا حکم جاری کیا ہے۔ دوسری جانب، قلات کے علاقے جتک آباد سے دو ماہ قبل اغوا کیے جانے والے شہری شبیر احمد کی لاش بھی برآمد ہوئی ہے۔ قانون نافذ کرنے والے اداروں نے دونوں واقعات کے بعد علاقوں کی ناکہ بندی کر کے سرچ آپریشن اور تحقیقات کا آغاز کر دیا ہے۔