کراچی، شہر کے مختلف علاقوں میں پولیس مقابلے، دو زخمیوں سمیت 3 ملزمان گرفتار

کراچی کے مختلف علاقوں میں پولیس نے مبینہ مقابلوں کے بعد 2 زخمیوں سمیت 3 ملزمان کو گرفتار کر کے ان کے قبضے سے اسلحہ، موبائل فونز، نقدی اور موٹرسائیکلیں برآمد کر لی ہیں۔ پہلی کارروائی کلفٹن کے علاقے بوٹ بیسن میں پیش آئی، جہاں اتوار بازار کے قریب گشت پر مامور پولیس اہلکاروں نے موٹرسائیکل سوار مشتبہ افراد کو رکنے کا اشارہ کیا۔ ملزمان نے فرار ہونے کی کوشش میں فائرنگ کر دی، جس پر پولیس کی جوابی کارروائی میں ایک ملزم ساحل ذوالفقار زخمی ہو گیا جبکہ اس کے ساتھی شاہد کو بھی گرفتار کر لیا گیا۔ دوسری کارروائی اورنگی ٹاؤن کے علاقے اقبال مارکیٹ میں سریا مل زافرانی کانٹے کے قریب کی گئی، جہاں پولیس اور جرائم پیشہ افراد کے درمیان فائرنگ کے تبادلے میں ایک ملزم نوید حسین شدید زخمی حالت میں پکڑا گیا، جبکہ اس کا ایک ساتھی موقع سے فرار ہونے میں کامیاب رہا۔ پولیس نے زخمی ملزمان کو فوری طبی امداد کے لیے اسپتال منتقل کر دیا ہے اور فرار ملزم کی گرفتاری کے لیے چھاپے مارے جا رہے ہیں۔