بلوچستان میں آپریشن ’شعبان‘ جاری، ایک دن میں فتنہ الہندوستان کے 14 دہشت گرد ہلاک

بلوچستان میں دہشت گردی کے مکمل خاتمے کے لیے سکیورٹی فورسز کا گرینڈ آپریشن ’شعبان‘ پوری قوت سے جاری ہے، جس کے دوران تازہ ترین فضائی اور زمینی کارروائیوں میں مزید 5 دہشت گرد مارے گئے ہیں۔ سکیورٹی ذرائع کے مطابق، دشوار گزار پہاڑی علاقوں اور دور دراز راستوں میں چھپے ان شرپسندوں کے خلاف کارروائی کے بعد ایک ہی دن میں ہلاک ہونے والے دہشت گردوں کی مجموعی تعداد 14 ہو گئی ہے۔ ہلاک شدگان کا تعلق مبینہ طور پر ’فتنہ الہندوستان‘ سے بتایا گیا ہے، جن کے قبضے سے بھاری مقدار میں اسلحہ، دستی بم، موٹر سائیکلیں، موبائل فونز اور کالعدم تنظیم کے جھنڈے برآمد کر لیے گئے ہیں۔ ذرائع کا کہنا ہے کہ 5 جولائی سے اب تک آپریشن شعبان اور دیگر انٹیلی جنس بیسڈ آپریشنز (IBOs) میں مجموعی طور پر 93 دہشت گرد جہنم واصل کیے جا چکے ہیں، جن میں اکیلے آپریشن شعبان کے دوران ہلاک ہونے والوں کی تعداد 57 ہے۔ دوسری جانب وزیراعظم شہباز شریف اور وفاقی وزیر داخلہ محسن نقوی نے سکیورٹی فورسز کی اس کامیابی کو زبردست خراجِ تحسین پیش کرتے ہوئے اس عزم کا اعادہ کیا ہے کہ جب تک صوبے سے آخری دہشت گرد کا خاتمہ نہیں ہو جاتا، یہ آپریشن بلا تعطل جاری رہے گا اور امن کے دشمنوں کو کہیں چھپنے کی جگہ نہیں ملے گی۔