پاکستان اسٹاک ایکسچینج کی ہفتہ وار رپورٹ؛ 100 انڈیکس میں 3130 پوائنٹس کی بڑی کمی، سرمایہ کاروں کے اربوں روپے ڈوب گئے

پاکستان اسٹاک ایکسچینج (PSX) میں گزشتہ کاروباری ہفتہ شدید مندی کی زد میں رہا، جس کے نتیجے میں سرمایہ کاروں کے 259 ارب 52 کروڑ روپے ڈوب گئے۔ ہفتہ وار رپورٹ کے مطابق، کے ایس ای (KSE) 100 انڈیکس میں مجموعی طور پر 3130 پوائنٹس کی بڑی کمی ریکارڈ کی گئی، جو کہ 1.69 فیصد تنزلی کو ظاہر کرتی ہے۔ کاروباری ہفتے کے دوران انڈیکس 8 ہزار 716 پوائنٹس کے ایک وسیع بینڈ میں ٹریڈ ہوا، جہاں اس کی بلند ترین سطح 188,127 پوائنٹس جبکہ کم ترین سطح 179,411 پوائنٹس رہی۔ تاہم، کاروباری ہفتے کے آخری روز پاک-امریکا تجارتی معاہدے کی مثبت توقعات نے مارکیٹ کو سہارا دیا اور انڈیکس کسی حد تک بحال ہو کر آخری روز 1 لاکھ 82 ہزار 242 پوائنٹس پر بند ہوا۔

مارکیٹ میں مندی کے باوجود تجارتی سرگرمیوں میں تیزی دیکھی گئی، اور اوسط یومیہ تجارتی حجم (والیم) ہفتہ وار بنیادوں پر 23.8 فیصد اضافے کے ساتھ 1 ارب 7 کروڑ شیئرز تک پہنچ گیا۔ اسی طرح مارکیٹ کی اوسط یومیہ تجارتی مالیت بھی 0.1 فیصد کی معمولی نمو کے ساتھ 17 کروڑ 15 لاکھ ڈالر رہی۔ ہفتے کے اختتام پر پی ایس ایکس کی مجموعی مارکیٹ کیپیٹلائزیشن 260 ارب روپے کی کمی کے بعد 20 ہزار 503 ارب روپے کی سطح پر آگئی۔