شاہد آفریدی خیبر پختونخوا چیمپئنز کرکٹ لیگ کے برانڈ ایمبیسیڈر مقرر

پاکستان کرکٹ ٹیم کے سابق مایہ ناز کپتان شاہد آفریدی کو خیبر پختونخوا چیمپئنز کرکٹ لیگ (کے سی ایل) کا برانڈ ایمبیسیڈر مقرر کر دیا گیا ہے۔ کے سی ایل کی انتظامیہ کے مطابق لیگ کی باقاعدہ لانچنگ تقریب 18 جولائی کو شام 6 بجے پشاور کرکٹ سٹیڈیم میں منعقد کی جائے گی۔ اس موقع پر شاہد آفریدی نے خیبر پختونخوا اور بالخصوص پشاور کے عوام اور کرکٹ شائقین سے اپیل کی ہے کہ وہ اپنے اہلِ خانہ کے ہمراہ اس تاریخی تقریب میں شرکت کر کے نوجوان کرکٹرز کی حوصلہ افزائی کریں اور صوبے میں کرکٹ کے اس نئے سفر کا حصہ بنیں۔

اس لیگ کے کمشنر اور سابق قومی کپتان یونس خان بھی اس منصوبے کے اہم ستون کے طور پر تقریب میں شریک ہوں گے، جبکہ پاکستان کے متعدد معروف سابق اور موجودہ انٹرنیشنل کرکٹرز بھی تقریب کی رونق بڑھائیں گے۔ واضح رہے کہ تقریب کے دوران لیگ کی باقاعدہ تاریخوں کا اعلان، صوبہ بھر میں ہونے والے ٹیلنٹ ہنٹ ٹرائلز، لیگ کی اہم تفصیلات اور آئندہ کی سرگرمیوں سے متعلق بڑے اعلانات کیے جائیں گے۔ کے سی ایل انتظامیہ نے فیملیز کی سہولت کے لیے خصوصی انتظامات کیے ہیں اور شائقین کے لیے فری ٹکٹس بھی مختص کیے گئے ہیں۔