گوجرانوالہ میں لوڈر مزدا سے 5 موٹرسائیکلیں ٹکرا گئیں، 3 افراد جاں بحق، 9 زخمی

گوجرانوالہ کے علاقے نوشہرہ ورکاں کے نواحی گاؤں سنیاریانوالہ میں ایک افسوسناک ٹریفک حادثے کے نتیجے میں 3 افراد جاں بحق جبکہ 9 زخمی ہو گئے ہیں۔ ریسکیو ذرائع کے مطابق، ایک لوڈر مزدا گاڑی پنکچر ہونے کے باعث سڑک کنارے لائٹس بند کر کے کھڑی تھی کہ اس دوران اندھیرے کی وجہ سے یکے بعد دیگرے پانچ موٹرسائیکلیں اس سے جا ٹکرائیں۔ حادثے میں جاں بحق ہونے والوں کی شناخت علی مالک، فیصل اور حمزہ کے ناموں سے ہوئی ہے، جبکہ زخمیوں میں خواتین سمیت 9 افراد شامل ہیں۔ ریسکیو ٹیموں نے اطلاع ملتے ہی فوری طور پر موقع پر پہنچ کر زخمیوں کو ابتدائی طبی امداد دی اور انہیں لاشوں سمیت قریبی اسپتال منتقل کیا۔

ریسکیو ذرائع کا کہنا ہے کہ حادثے کا شکار ہونے والے تمام افراد کا تعلق گوجرانوالہ کے علاقے چھچھروالی سے ہے۔ پولیس ذرائع کے مطابق، یہ تمام افراد پیر وارث شاہ کے دربار پر حاضری کے لیے جا رہے تھے کہ راستے میں یہ المناک حادثہ پیش آ گیا، پولیس نے واقعے کی باقاعدہ تحقیقات شروع کر دی ہیں۔