وزیر صحت کا نائٹ پارٹیز اور منشیات سے ایچ آئی وی کے کیسز بڑھنے کا انکشاف

وفاقی وزیر صحت مصطفیٰ کمال نے سنسنی خیز انکشاف کیا ہے کہ ملک کے بڑے شہروں میں نائٹ پارٹیز، منشیات کے بڑھتے ہوئے استعمال اور غیر محفوظ رویوں کے باعث ایچ آئی وی (HIV) کے کیسز تیزی سے رپورٹ ہو رہے ہیں۔ انہوں نے خبردار کیا کہ ہماری سوسائٹی میں نوجوانوں کے اندر نائٹ پارٹیز اور منشیات کا رجحان تشویشناک حد تک بڑھ رہا ہے، اور سامنے آنے والے متعدد کیسز براہِ راست انہی عوامل سے منسلک ہیں۔ وزیر صحت کا کہنا تھا کہ بڑے شہروں میں استعمال شدہ سرنجوں کے دوبارہ استعمال، سیکس ورکرز اور نائٹ پارٹیز میں نشے کے بعد غیر محفوظ جنسی رویوں کے باعث ایچ آئی وی پھیل رہا ہے اور ملک کا کوئی بھی بڑا شہر اس سے محفوظ نہیں رہا۔ انہوں نے بتایا کہ وزیراعظم کی خصوصی ہدایت پر اس سنگین صورتحال سے متعلق ایک تفصیلی رپورٹ تیار کر کے متعلقہ حکام کو ضروری ہدایات جاری کر دی گئی ہیں۔

مصطفیٰ کمال نے واضح کیا کہ وفاقی حکومت اس معاملے پر تمام صوبائی حکومتوں کے ساتھ قریبی رابطے میں ہے، جہاں وفاق کی جانب سے نشاندہی پر صوبائی حکام کارروائی کرتے ہیں۔ انہوں نے مزید کہا کہ وفاقی دارالحکومت میں ‘آئی ایچ آر اے’ (IHRA) صورتحال کی نگرانی کر رہی ہے، تاہم نائٹ پارٹیز جیسی سرگرمیوں کو روکنا ان کے دائرہ اختیار میں نہیں بلکہ یہ قانون نافذ کرنے والے اداروں کی ذمہ داری ہے۔ وفاقی وزیر صحت نے والدین پر زور دیا کہ وہ اس خاموش وباء سے اپنے بچوں کو بچانے کے لیے ان کی سرگرمیوں پر کڑی نظر رکھیں، ان سے پوچھ گچھ کریں اور اس بات کو یقینی بنائیں کہ وہ کسی بھی غلط صحبت یا منفی سرگرمی کا حصہ نہ بنیں۔