رشتے کے تنازع پر خونریز تصادم، باپ بیٹے سمیت 6 افراد جاں بحق

پریالو کے علاقے کوٹ غلام محمد میں ناریجو برادری کے دو گروپوں کے درمیان پرانی رنجش اور رشتے کے تنازع پر ہونے والے مسلح تصادم میں باپ اور بیٹے سمیت 6 افراد جاں بحق جبکہ 3 شدید زخمی ہو گئے ہیں۔ پولیس ذرائع کے مطابق، یہ افسوسناک واقعہ تھانہ فیض محمد بنڈو کی حدود میں پیش آیا جہاں دونوں گروپوں نے ایک دوسرے پر جدید اسلحے سے اندھا دھند فائرنگ کر دی۔ پولیس کا کہنا ہے کہ جاں بحق ہونے والوں میں 4 مرد اور 2 خواتین شامل ہیں۔ واقعے کی اطلاع ملتے ہی ایس ایس پی خیرپور کی ہدایت پر پولیس کی بھاری نفری، بکتر بند گاڑیاں اور اے پی سی (APC) فوراً موقع پر پہنچ گئیں، جنہوں نے لاشوں اور زخمیوں کو پیر جو گوٹھ ہسپتال اور گمس (GIMS) ہسپتال منتقل کیا۔

مقامی ذرائع کے مطابق، دونوں گروپوں کے درمیان وقفے وقفے سے فائرنگ کا سلسلہ جاری رہنے کے باعث پورے علاقے میں شدید خوف و ہراس پھیل گیا ہے اور کاروباری سرگرمیاں معطل ہو کر رہ گئی ہیں۔ پولیس نے جائے وقوعہ کو گھیرے میں لے کر پوزیشنیں سنبھال لی ہیں تاکہ مزید خونریزی کو روکا جا سکے۔ پولیس حکام کا کہنا ہے کہ ملزمان کی گرفتاری کے لیے چھاپے مارے جا رہے ہیں اور واقعے کی مزید تفصیلی تحقیقات کا آغاز کر دیا گیا ہے۔