صادق آباد احتجاج کیس: علیمہ خان کے صفائی کے گواہ کا بیان ریکارڈ

راولپنڈی کی انسدادِ دہشت گردی عدالت نے 26 نومبر کے تھانہ صادق آباد احتجاج کیس میں بانی پی ٹی آئی کی ہمشیرہ علیمہ خان کے خلاف مقدمے کی سماعت کل جمعہ 10 جولائی تک ملتوی کر دی ہے۔ سماعت کے دوران انسدادِ دہشت گردی عدالت کے جج امجد علی شاہ نے علیمہ خان کی جانب سے ڈیفنس گواہ کا بیان ریکارڈ کرنے کی درخواست منظور کر لی، جس کے بعد ان کے صفائی کے گواہ فتح اللہ ایڈووکیٹ کا بیان عدالت میں ریکارڈ کر لیا گیا۔ عدالت نے حکم دیا ہے کہ سرکاری وکیل کل جمعہ کو ڈیفنس گواہ پر جرح مکمل کریں گے۔ اس اہم کیس میں کل ہی علیمہ خان کے خلاف ٹرائل مکمل ہونے کا قوی امکان ہے، جس کے پیشِ نظر عدالت نے علیمہ خان سمیت تمام 11 ملزمان کو کل ذاتی حیثیت میں طلب کر لیا ہے۔