کارگل جنگ کے ہیرو حوالدار لالک جان کا آج 27 واں یوم شہادت
Web Desk
7 July 2026
معرکہ کارگل میں دشمن کے دانت کھٹے کرنے والے اور پاکستان کے سب سے بڑے عسکری اعزاز ‘نشانِ حیدر’ سے سرفراز ہونے والے حوالدار لالک جان شہید کا آج 27 واں یومِ شہادت منایا جا رہا ہے۔ اس دن کی مناسبت سے شہید کے آبائی علاقے میں واقع مزار پر پروقار تقریب منعقد ہوئی، جس میں پاک فوج کے دستے نے گارڈ آف آنر پیش کیا اور اعلیٰ عسکری حکام نے مزار پر پھول چڑھا کر فاتحہ خوانی کی۔
پاک فوج کے شعبہ تعلقات عامہ (ISPR) کے مطابق، عسکری قیادت بشمول چیئرمین جوائنٹ چیفس آف اسٹاف کمیٹی، آرمی چیف، ایئر چیف اور نیول چیف نے حوالدار لالک جان شہید کو مادرِ وطن کے دفاع میں پیش کی گئی ان کی غیر معمولی جرات اور بہادری پر زبردست خراجِ عقیدت پیش کیا ہے۔
آئی ایس پی آر کے مطابق، سال 1999ء میں کارگل جنگ کے دوران حوالدار لالک جان شہید نے دشمن کے سامنے فولادی دیوار بن کر غیر معمولی شجاعت کا مظاہرہ کیا۔ انہوں نے نہ صرف دشمن کے متعدد جارحانہ حملوں کو بے خوفی سے پسپا کیا بلکہ شدید زخمی ہونے کے باوجود اپنی پوسٹ چھوڑنے سے صاف انکار کر دیا۔ وہ زخموں سے چور ہونے کے باوجود محاذ پر ڈٹے رہے اور انخلاء کی پیشکش ٹھکرا کر آخری سانس تک لڑتے رہے، یہاں تک کہ فرض کی ادائیگی میں جامِ شہادت نوش کر لیا۔
ترجمان افواجِ پاکستان کا کہنا ہے کہ مسلح افواج اور پوری قوم شہید کی اس عظیم قربانی کو بے پناہ احترام اور تشکر کے ساتھ یاد کرتی ہے۔ حوالدار لالک جان شہید کی یہ میراث پاکستان کی مسلح افواج کی موجودہ اور آنے والی نسلوں کے لیے ہمیشہ ایک مشعلِ راہ رہے گی۔ عسکری قیادت نے اس عزم کا اعادہ کیا ہے کہ شہداء کی مقدس امانت اور مادرِ وطن کے دفاع کے مشن کو ہر قیمت پر جرات، لگن اور غیرت کے ساتھ جاری رکھا جائے گا۔
متعلقہ عنوانات
ہم اعتراف کرنے پر بلاول بھٹو کے مشکور ہیں: ایم کیو ایم کا چیئرمین پی پی کے بیان پر ردعمل
17 November 2026
کراچی کسی کے باپ کی جاگیر نہیں، ہر پاکستانی کو یہاں ترقی میں حصہ لینے کا حق ہے: فاروق ستار
17 November 2026
پرویز الہٰی سے پی ٹی آئی کے ارکان اسمبلی کی ملاقات، سیاسی صورتحال پر تبادلہ خیال
17 November 2026
جامشورو کے گاؤں میں گیسٹرو اور ڈائریا کی وبا پھیل گئی، درجنوں کیسز رپورٹ
17 November 2026
گھریلو ملازمہ فاطمہ ہلاکت کیس، شیری رحمان کا ملزموں کو قرار واقعی سزا کا مطالبہ
17 November 2026
عطا تارڑ طعنے نہ دیں، ہمت ہے تو کہیں پیپلزپارٹی کی ضرورت نہیں: شرجیل میمن
17 November 2026
میر رضا قتل کیس: جے آئی ٹی سربراہ کی اہل خانہ سے ملاقات، تفتیش میں پیشرفت سے آگاہ کیا
17 November 2026
ادویات کی بارکوڈنگ اور سیریلائزیشن لازمی قرار، ڈریپ کا اہم فیصلہ
17 November 2026