وزیراعلیٰ گلگت بلتستان امجد حسین نے حلف اٹھا لیا، عوامی توقعات پر پورا اترنے کا عزم

نومنتخب وزیراعلیٰ گلگت بلتستان امجد حسین ایڈووکیٹ نے باقاعدہ طور پر اپنی وزارتِ اعلیٰ کا حلف اٹھا لیا ہے۔

حلف برداری کی مرکزی اور پروقار تقریب وزیراعلیٰ سیکرٹریٹ چنار باغ میں منعقد ہوئی، جہاں گورنر گلگت بلتستان سید مہدی شاہ نے نومنتخب وزیراعلیٰ امجد حسین ایڈووکیٹ سے ان کے عہدے کا حلف لیا۔ اس اہم ترین تقریبِ حلف برداری میں پاکستان پیپلز پارٹی کے چیئرمین بلاول بھٹو زرداری، پارٹی کی مرکزی و صوبائی قیادت، نو منتخب عوامی نمائندوں اور مختلف سیاسی و سماجی شخصیات نے بڑی تعداد میں شرکت کی۔ اس کے علاوہ وفاقی وزیر امیر مقام بھی تقریب میں خصوصی طور پر شریک ہوئے۔ اس موقع پر مہمانوں اور عوام کی آمدورفت کو محفوظ بنانے کے لیے سکیورٹی اور ٹریفک کے خصوصی انتظامات کیے گئے تھے۔

 وزیراعلیٰ وزارتِ اعلیٰ کا حلف اٹھانے کے بعد میڈیا اور شرکا سے گفتگو کرتے ہوئے وزیراعلیٰ گلگت بلتستان امجد حسین ایڈووکیٹ نے کہا کہ خطے کے نوجوانوں اور ماؤں بہنوں نے الیکشن میں پاکستان پیپلز پارٹی کا بھرپور ساتھ دیا ہے۔ انہوں نے عزم ظاہر کیا کہ پیپلز پارٹی کا گلگت بلتستان کے ساتھ تین نسلوں کا دیرینہ رشتہ ہے جو ہمیشہ برقرار رہے گا۔

ان کا مزید کہنا تھا کہ دیامر کی تاریخ میں پہلی بار پاکستان پیپلز پارٹی کو عوام کی جانب سے بھاری مینڈیٹ ملا ہے۔ عوام نے ان پر جس بڑی ذمہ داری کا بوجھ سونپا ہے، وہ اس پر پورا اترنے اور ان کی توقعات کے مطابق علاقے کی ترقی کے لیے اپنی تمام تر صلاحیتیں بروئے کار لانے کی مخلصانہ کوشش کریں گے۔