صدر، وزیراعظم کا شہید گروپ کیپٹن عاصم طارق کو خراجِ عقیدت

صدرِ مملکت آصف علی زرداری اور وزیراعظم محمد شہباز شریف نے پاک فضائیہ کے شہید گروپ کیپٹن عاصم طارق کو ان کی بے مثال جرأت، بہادری اور فرض شناسی پر زبردست خراجِ عقیدت پیش کیا ہے۔

صدر مملکت آصف علی زرداری نے گروپ کیپٹن عاصم طارق کی شہادت پر گہرے دکھ اور رنج و غم کا اظہار کرتے ہوئے کہا کہ ایک بے گناہ خاتون کی جان اور عزت بچانے کے لیے اپنی جان کا نذرانہ پیش کرنا اعلیٰ انسانی اقدار اور قومی خدمت کی ایک روشن ترین مثال ہے۔ انہوں نے شہید کے سوگوار خاندان سے دلی تعزیت کا اظہار کیا اور ان کے لیے صبرِ جمیل کی دعا کی۔

صدرِ مملکت نے اس بات پر گہری تشویش کا اظہار کرتے ہوئے مزید کہا کہ وفاقی دارالحکومت اسلام آباد کی ایک اہم شاہراہ پر اس نوعیت کا سنگین واقعہ پیش آنا انتہائی تشویش کا باعث ہے، اور انتظامیہ کے لیے ایسے جرائم کی مکمل روک تھام کو یقینی بنانا بے حد ضروری ہے۔

 دوسری جانب، وزیراعظم محمد شہباز شریف نے بھی گروپ کیپٹن عاصم طارق کی قربانی کو سراہتے ہوئے کہا کہ انہوں نے ایک خاتون کے تحفظ کے لیے اپنی جان قربان کر کے بہادری اور فرض شناسی کی ایک لازوال داستان رقم کی ہے۔

وزیراعظم نے اپنے بیان میں کہا کہ پاکستانی قوم اپنے ایسے بہادر سپوتوں کی قربانیوں کو ہمیشہ انتہائی قدر اور احترام کی نگاہ سے دیکھتی ہے اور اس کڑے وقت میں پوری قوم شہید کے اہل خانہ کے غم میں برابر کی شریک ہے۔ انہوں نے دعا کی کہ اللہ تعالیٰ شہید کے درجات بلند فرمائے اور لواحقین کو یہ صدمہ برداشت کرنے کی توفیق عطا فرمائے۔