بہاولنگر: مسلح کار سواروں نے 2 لڑکیوں کو گن پوائنٹ پر اغوا کر لیا

چک نادر شاہ میں ایک انتہائی لرزہ خیز واردات سامنے آئی ہے جہاں کار پر سوار 5 مسلح افراد نے گن پوائنٹ پر دو کمسن لڑکیوں کو اغوا کر لیا، جبکہ ملزمان کی جانب سے کی جانے والی اندھا دھند فائرنگ کے نتیجے میں مزاحمت کرنے والے 2 نوجوان شدید زخمی ہو گئے۔

پولیس حکام کے مطابق، اغوا کی جانے والی لڑکیوں میں 16 سالہ نادیہ اور 17 سالہ رانی بی بی شامل ہیں۔ واردات کے دوران جب مقامی اوباشوں کو روکنے کی کوشش کی گئی تو ملزمان نے فائرنگ کر دی، جس کی زد میں آ کر عبدالجبار اور جبرو نامی دو نوجوان زخمی ہو گئے۔ دونوں زخمیوں کو فوری طبی امداد کے لیے ڈسٹرکٹ ہسپتال منتقل کر دیا گیا ہے۔

اطلاع ملتے ہی پولیس کی بھاری نفری فوری طور پر جائے وقوعہ پر پہنچ گئی۔ عینی شاہدین اور پولیس کے مطابق، ملزمان لڑکیوں کو زبردستی کار میں ڈالنے کے بعد خوف و ہراس پھیلانے کے لیے ہوائی فائرنگ کرتے ہوئے موقع سے باآسانی فرار ہونے میں کامیاب ہو گئے۔ مقامی صدر پولیس نے واقعے کا نوٹس لیتے ہوئے زخمی نوجوان کی مدعیت میں مقدمہ درج کر کے باقاعدہ قانونی کارروائی کا آغاز کر دیا ہے۔ پولیس حکام کا کہنا ہے کہ علاقے کی ناکہ بندی کر دی گئی ہے اور ملزمان کی گرفتاری کے لیے چھاپے مارے جا رہے ہیں، تاہم تاحال کوئی گرفتاری عمل میں نہیں آ سکی ہے