موٹروے پولیس کی بروقت کارروائی، جلتی بس سے مسافروں کو ریسکیو کر لیا

لاہور سے فیصل آباد جانے والی ایک تیز رفتار مسافر بس میں اچانک ہولناک آگ بھڑک اٹھی، تاہم موٹروے پولیس کی فوری، بروقت اور پیشہ ورانہ کارروائی کے باعث بس میں سوار تمام مسافروں کو بحفاظت نکال لیا گیا جس سے ایک بڑا حادثہ ہونے سے ٹل گیا۔

موٹروے پولیس سنٹرل ریجن کے ترجمان سید عمران احمد کے مطابق، مسافر بس کے پچھلے بائیں پہیوں کے اچانک جام ہو جانے اور رگڑ کھانے کے باعث یہ آگ لگی۔ واقعے کی اطلاع جیسے ہی موٹروے پولیس کی ایمرجنسی ہیلپ لائن 130 پر موصول ہوئی، پٹرولنگ پر مامور اہلکار فوری طور پر جائے وقوعہ پر پہنچ گئے۔

 موٹروے پولیس کے اہلکاروں نے جائے وقوعہ پر پہنچتے ہی سب سے پہلے بس میں موجود تمام مسافروں اور ان کے قیمتی سامان کو بحفاظت باہر نکال کر محفوظ مقام پر منتقل کیا۔ اس کے بعد اہلکاروں نے فائر ایکسٹنگوشر (آگ بجھانے والے آلات) کی مدد سے بس میں لگی آگ پر بروقت قابو پا لیا۔

 واقعے میں بس کے پہیوں کو جزوی نقصان پہنچا، تاہم پولیس کی فوری ترین کارروائی کی بدولت کوئی جانی یا مالی نقصان نہیں ہوا اور قیمتی انسانی جانیں ضائع ہونے سے بچ گئیں۔

بس میں سوار مسافروں اور بس کے ڈرائیور نے موٹروے پولیس کی اس بروقت، بہادرانہ اور پیشہ ورانہ کارروائی کو دل کھول کر سراہا اور موقع پر جان بچانے والے اہلکاروں کا شکریہ ادا کیا۔