لاہور میں ٹرین کی زد میں آکر 34 سالہ شخص جاں بحق ہوگیا

صوبائی دارالحکومت کے علاقے گلبرگ میں ٹرین کی زد میں آکر ایک 34 سالہ شخص موقع پر ہی جاں بحق ہو گیا ہے۔ عینی شاہدین کے مطابق یہ دلخراش واقعہ گلبرگ تھری میں سوئی گیس آفس کے قریب پیش آیا، جہاں ایک نوجوان ریلوے پھاٹک عبور کرنے کی کوشش کر رہا تھا کہ اچانک تیز رفتار ٹرین کی زد میں آ گیا۔ ٹرین کی ٹکر اتنی شدید تھی کہ نوجوان موقع پر ہی دم توڑ گیا۔

واقعے کی اطلاع ملتے ہی ریسکیو 1122 کے اہلکار فوری طور پر موقع پر پہنچ گئے۔ ریسکیو حکام کے مطابق جاں بحق ہونے والے شخص کی شناخت 34 سالہ نسیم ولد علی کے نام سے ہوئی ہے۔ ریسکیو ٹیم نے ضروری کارروائی کے بعد لاش کو مردہ خانے منتقل کر دیا ہے، جبکہ متعلقہ اداروں نے واقعے کی مزید قانونی کارروائی شروع کر دی ہے۔