سانگھڑ میں مبینہ پولیس مقابلہ، ایک ملزم زخمی حالت میں گرفتار، منشیات اور اسلحہ برآمد

سانگھڑ میں سی آئی اے پولیس نے ایک مبینہ مقابلے کے بعد نامی گرامی منشیات فروش کو زخمی حالت میں گرفتار کر لیا ہے۔

پولیس حکام کے مطابق یہ کارروائی سنجھورو بائی پاس کے قریب اس وقت پیش آئی جب ملزم منشیات لے کر جا رہا تھا۔ پولیس نے اسے رکنے کا اشارہ کیا تو ملزم نے گرفتاری سے بچنے کے لیے فائرنگ کر دی۔ پولیس کی جوابی فائرنگ کے نتیجے میں ملزم شیر خان کنڈانی زخمی ہو گیا، جسے فوری طور پر حراست میں لے لیا گیا۔

حکام نے بتایا کہ گرفتار ملزم کے قبضے سے بھاری مقدار میں سفینہ گٹکا، ایک پستول اور گولیاں برآمد ہوئی ہیں۔ زخمی ملزم کو طبی امداد کے لیے سول ہسپتال منتقل کر دیا گیا ہے۔ پولیس نے ملزم کا کریمنل ریکارڈ چیک کرنا شروع کر دیا ہے جبکہ فرار ہونے والے اس کے دیگر ساتھیوں کی گرفتاری کے لیے بھی چھاپے مارے جا رہے ہیں۔