میرپور خاص: پولیس کی بڑی کارروائی، بین الصوبائی گینگ کے 4 منشیات فروش گرفتار

سیٹلائٹ ٹاؤن پولیس نے کارروائی کرتے ہوئے بین الصوبائی گینگ کے 4 مبینہ منشیات فروشوں کو گرفتار کر لیا ہے۔

پولیس حکام کے مطابق خفیہ اطلاع پر گاؤں کاک بنگلو میں چھاپہ مارا گیا جہاں سے بھاری مقدار میں گٹکا برآمد ہوا۔ پولیس نے کارروائی کے دوران منشیات کی ترسیل اور اسمگلنگ میں استعمال ہونے والی ایک پراڈو اور آلٹو کار بھی اپنے قبضے میں لے لی ہے۔

حکام نے بتایا کہ گرفتار کیے گئے ملزمان کی شناخت محمد نوید، شاہد اکبر، محمد اظہر اور احمد رضا کے ناموں سے ہوئی ہے اور ان کا تعلق پنجاب کے ضلع راجن پور سے ہے۔ پولیس نے چاروں ملزمان کے خلاف مقدمہ درج کر کے مزید تحقیقات کا آغاز کر دیا ہے۔