پاک فوج اور شہدا ہمارے ماتھے کا جھومر، قربانیاں ناقابل فراموش ہیں: گورنر پنجاب

گورنر پنجاب سردار سلیم حیدر خان نے پاک فوج کے بہادر سپوت شہید کیپٹن کرنل شیر خان (نشانِ حیدر) کو زبردست خراجِ عقیدت پیش کرتے ہوئے کہا ہے کہ پاک فوج اور شہدا ہمارے ماتھے کا جھومر ہیں اور ان کی قربانیاں ناقابلِ فراموش ہیں۔

راولپنڈی میں پارٹی کارکنوں سے خطاب کرتے ہوئے گورنر پنجاب کا کہنا تھا کہ یہ ملک قائم ہے تو ہی ہم سیاست کر رہے ہیں۔ انہوں نے 5 جولائی 1977 کے واقعے کو سیاہ اقدام قرار دیتے ہوئے کہا کہ اس دن منتخب حکومت کا تختہ الٹ کر جمہوریت پر شب خون مارا گیا، جس نے ملک کو کئی سال پیچھے دھکیل دیا۔ ان کا کہنا تھا کہ پاکستان پیپلز پارٹی (پی پی پی) کی قیادت اور کارکنوں نے جمہوریت کی بحالی اور آئین کے تحفظ کے لیے بے پناہ قربانیاں دیں اور صعوبتیں برداشت کیں۔ ہم جمہوری عمل کا حصہ ہیں اور اس کی مضبوطی کے لیے اپنا کردار ادا کرتے رہیں گے۔

سردار سلیم حیدر خان نے سیاسی حوالے سے بات کرتے ہوئے مزید کہا کہ پیپلز پارٹی آزاد کشمیر میں ہونے والے انتخابات میں بھرپور حصہ لے رہی ہے۔ انہوں نے دعویٰ کیا کہ بلاول بھٹو زرداری پاکستان کے اگلے وزیر اعظم ہوں گے کیونکہ وہ ملک کے محکوم اور پسماندہ طبقے کی واحد امید ہیں۔