کالعدم ایکشن کمیٹی کے شرپسندوں نے آزاد کشمیر پولیس کے 4 اہلکاروں اغوا کرلیے

آزاد کشمیر کے شہر راولاکوٹ میں جاری دھرنے میں عوام کی عدم دلچسپی اور واضح ناکامی کے بعد کالعدم جوائنٹ عوامی ایکشن کمیٹی شدید بوکھلاہٹ کا شکار ہو گئی ہے، جس کے بعد شرپسند عناصر قانون کو ہاتھ میں لینے اور انتشار پھیلانے پر اتر آئے ہیں۔

ذرائع کے مطابق انتشاری کمیٹی کے سرغنہ خواجہ مہران اور اس کے کارندوں نے راولاکوٹ کا پرامن ماحول خراب کرنے کے لیے اوچھے ہتھکنڈے استعمال کرتے ہوئے آزاد کشمیر پولیس کے 4 اہلکاروں کو اغوا کر لیا ہے۔ اغوا ہونے والے اہلکاروں میں سلیکشن گریڈ کانسٹیبل شاہد شفیق، سلیکشن گریڈ کانسٹیبل محمد صغیر، کانسٹیبل محمد اشتیاق اور کانسٹیبل ذیشان اسحاق شامل ہیں۔

بتایا گیا ہے کہ ان پولیس اہلکاروں کو اس وقت اغوا کیا گیا جب وہ اپنے گھر سے ڈیوٹی کے لیے راولاکوٹ جا رہے تھے۔ آزاد جموں و کشمیر پولیس کے یہ چاروں اہلکار اس وقت بھی کالعدم ایکشن کمیٹی کے شرپسند عناصر کی غیر قانونی حراست میں ہیں۔

واضح رہے کہ یہ پہلا موقع نہیں ہے جب اس گروپ نے قانون نافذ کرنے والے اداروں کو نشانہ بنایا ہو؛ اس سے قبل بھی ان شرپسند عناصر نے پولیس کے ایک اے ایس آئی (ASI) کو اغوا کر کے بدترین تشدد کا نشانہ بنایا تھا، جبکہ یہی ٹولہ سی ایم ایچ (CMH) پر بھی حملہ آور ہو چکا ہے۔ پولیس اہلکاروں کی بحفاظت بازیابی کے لیے اقدامات کیے جا رہے ہیں۔