راولپنڈی میں قیدی وین سے فرار تمام حوالاتی گرفتار کرلیے : پولیس ترجمان

قیدی وین سے فرار ہونے والے تمام حوالاتیوں کی گرفتاری کے لیے شروع کیا گیا پولیس کا گرینڈ آپریشن کامیابی سے مکمل ہو گیا ہے۔

پولیس ذرائع کے مطابق وین سے فرار ہونے والے تمام 14 حوالاتیوں کو دوبارہ گرفتار کر لیا گیا ہے۔ آپریشن کے آخری مرحلے میں مفرور ہونے والے آخری حوالاتی ‘اسد’ کو بھی حراست میں لے لیا گیا ہے۔

ذرائع کا کہنا ہے کہ پولیس نے انتہائی مستعدی کا مظاہرہ کرتے ہوئے ابتدائی 72 گھنٹوں کے اندر 14 میں سے 13 مفرور حوالاتیوں کو دھر لیا تھا، جبکہ 14 ویں مفرور ملزم کی گرفتاری تک سرچ آپریشن مسلسل جاری رکھا گیا جو اب باقاعدہ طور پر اختتام پذیر ہو چکا ہے۔

ترجمان راولپنڈی پولیس نے میڈیا کو بتایا کہ اس گرینڈ آپریشن کے دوران قلیل وقت میں، بغیر کسی ناخوشگوار واقعے کے تمام فرار ملزمان کو بحفاظت دوبارہ گرفتار کرنا پولیس کی بڑی کامیابی ہے۔