پشاور: میاں گل رخ علی شاہ ’وزیراعظم یوتھ پروگرام‘ کی فوکل پرسن نامزد

وزیراعظم یوتھ پروگرام کے تحت خیبر پختونخوا کے ضلع نوشہرہ کے علاقے پیرپیائی سے تعلق رکھنے والی معروف سماجی شخصیت میاں گل رخ علی شاہ کو فوکل پرسن نامزد کر دیا گیا ہے۔ میاں گل رخ علی شاہ، مرحوم خان بہادر شہزاد میر خان کی پڑنواسی ہیں اور وہ طویل عرصے سے خواتین کو بااختیار بنانے، نوجوانوں کی فلاح و ترقی اور دیگر سماجی خدمات کے شعبوں میں گراں قدر اور متحرک کردار ادا کر رہی ہیں۔

اپنی اس اہم نامزدگی پر میاں گل رخ علی شاہ نے وزیراعظم یوتھ پروگرام کی اعلیٰ قیادت کا شکریہ ادا کیا۔ انہوں نے اپنے عزم کا اظہار کرتے ہوئے کہا کہ وہ سونپی گئی اس نئی ذمہ داری کو احسن طریقے سے نبھائیں گی اور نوجوانوں، بالخصوص خواتین کو تعلیم، جدید ہنر مندی (اسکلز ڈویلپمنٹ) اور روزگار کے بہترین مواقع فراہم کرنے کے لیے بھرپور انداز میں کام کریں گی۔

دوسری جانب، میاں گل رخ علی شاہ کی اس اہم منصب پر نامزدگی کا نوشہرہ اور پیرپیائی کے مختلف سماجی، سیاسی اور عوامی حلقوں نے بھرپور خیرمقدم کیا ہے۔ متعدد معززین نے انہیں مبارکباد پیش کرتے ہوئے اس امید کا اظہار کیا ہے کہ ان کی قیادت میں علاقے کے نوجوانوں کے مسائل حل ہوں گے اور انہوں نے میاں گل رخ کے لیے نیک خواہشات کا اظہار بھی کیا