ڈیرہ بگٹی: دو گروہوں کے درمیان فائرنگ، چار افراد جاں بحق، ایک زخمی

بلوچستان کے ضلع ڈیرہ بگٹی کے علاقے زین کوہ درینجن میں رقم کے لین دین کے تنازع پر دو گروپوں کے درمیان ہونے والی ہولناک فائرنگ کے نتیجے میں 4 افراد جاں بحق جبکہ ایک شخص شدید زخمی ہو گیا ہے۔

مقامی پولیس کے مطابق، دونوں گروپوں کے درمیان پیسے کے معاملے پر تلخ کلامی ہوئی جس نے دیکھتے ہی دیکھتے مسلح تصادم کی شکل اختیار کر لی۔ فائرنگ کے اس افسوسناک واقعے میں دونوں اطراف سے جانی نقصان ہوا ہے۔

پولیس حکام نے تفصیلات بتاتے ہوئے کہا ہے کہ جاں بحق ہونے والوں میں ایک گروپ سے تعلق رکھنے والے باپ اور سگا بیٹا شامل ہیں، جبکہ دوسرے گروپ کے دو سگے بھائی گولیوں کا نشانہ بن کر دم توڑ گئے۔ واقعے کے بعد پولیس نے لاشوں اور زخمی شخص کو ہسپتال منتقل کر دیا ہے اور واقعے کی تفتیش شروع کر دی گئی ہے