میلے کے آسمانی جھولے سے گر کر 8 سالہ بچہ جاں بحق

تھانہ صدر کے علاقے میں واقع نواحی گاؤں ٹپیالہ دوست محمد کے ایک تفریحی میلے میں افسوسناک حادثہ پیش آیا ہے، جہاں آسمانی جھولے سے گر کر 8 سالہ بچہ جاں بحق ہو گیا۔

ریسکیو ذرائع کے مطابق، میلے میں جھولا جھولتے ہوئے اچانک نیچے گرنے سے 8 سالہ ارحم ولد مجید شدید زخمی ہو گیا۔ بچے کو فوری طور پر طبی امداد کے لیے تحصیل ہیڈ کوارٹر (ٹی ایچ کیو) ہسپتال منتقل کیا گیا، جہاں ڈاکٹروں نے اسے بچانے کی بھرپور کوشش کی، تاہم وہ زخموں کی تاب نہ لاتے ہوئے دورانِ علاج دم توڑ گیا۔

ہسپتال ذرائع کا کہنا ہے کہ جاں بحق بچے کی لاش کو ضروری قانونی کارروائی مکمل کرنے کے بعد شدید غمزدہ ورثا کے حوالے کر دیا گیا ہے۔ دوسری جانب پولیس نے واقعے کا نوٹس لیتے ہوئے حادثے کی وجوہات جاننے کے لیے مختلف پہلوؤں سے تحقیقات کا آغاز کر دیا ہے۔