لاہور میں روہی نالہ کے قریب نامعلوم نوجوان کی لاش برآمد

کاہنہ کے علاقے میں گجومتہ روہی نالہ کے قریب سے ایک نامعلوم نوجوان کی لاش برآمد ہوئی ہے۔ واقعے کی اطلاع ملتے ہی مقامی پولیس نے موقع پر پہنچ کر لاش کو قبضے میں لے لیا۔

پولیس کے مطابق جاں بحق ہونے والے شخص کی عمر تقریباً 23 سال ہے، جس کی شناخت تاحال ممکن نہیں ہو سکی۔ لاش کو ضروری قانونی کارروائی اور پوسٹ مارٹم کے لیے جناح ہسپتال کے مردہ خانے منتقل کر دیا گیا ہے۔

دوسری جانب، تفتیشی حکام کا ابتدائی مشاہدے کے بعد کہنا ہے کہ متوفی بظاہر نشے کا عادی معلوم ہوتا ہے اور خدشہ ہے کہ موت نشے کی زیادتی کے باعث ہوئی ہو۔ تاہم، پولیس کا مزید کہنا ہے کہ موت کی حتمی اور اصل وجہ پوسٹ مارٹم رپورٹ آنے کے بعد ہی معلوم ہو سکے گی۔ پولیس نے واقعے کی رپورٹ درج کر کے مختلف زاویوں سے مزید تحقیقات کا آغاز کر دیا ہے۔