اوکاڑہ میں اینٹی کرپشن کی کارروائیوں کے دوران 2 رشوت خور سرکاری ملازمین گرفتار

پنجاب کے شہر اوکاڑہ میں محکمہ اینٹی کرپشن نے بڑی کارروائیاں کرتے ہوئے رشوت ستانی میں ملوث دو سرکاری ملازمین کو رنگے ہاتھوں گرفتار کر لیا ہے۔

ذرائع کے مطابق، پہلی کارروائی میں واسا (WASA) کا سپروائزر مقصود احمد 20 ہزار روپے رشوت لیتے ہوئے پکڑا گیا۔ یہ کارروائی سول جج کی خصوصی موجودگی میں کی گئی، جس کے دوران ملزم کے قبضے سے نشان زدہ نوٹ بھی برآمد کر لیے گئے۔

دوسری کارروائی میں میونسپل کمیٹی کا سپروائزر سلیم خان 15 ہزار روپے رشوت لیتے ہوئے موقع پر ہی دھر لیا گیا۔ اینٹی کرپشن حکام کے مطابق، دونوں کرپٹ ملازمین کے خلاف تھانہ اینٹی کرپشن میں الگ الگ مقدمات درج کر کے قانونی کارروائی کا آغاز کر دیا گیا ہے۔

اس حوالے سے ڈپٹی ڈائریکٹر اینٹی کرپشن نے واضح پیغام دیتے ہوئے کہا کہ محکمہ سرکار میں موجود کالی بھیڑوں اور رشوت خور عناصر کے خلاف بلا امتیاز کریک ڈاؤن جاری رکھے گا اور شہریوں کو لوٹنے والوں کے ساتھ کوئی رعایت نہیں برتی جائے گی۔