پاکستان ہاکی فیڈریشن نے مزید غیر ملکی کوچز کی تقرریاں کر دیں

پاکستان ہاکی فیڈریشن (پی ایچ ایف) نے ملک میں ہاکی کے گرتے ہوئے معیار کو سہارا دینے اور کھیل کی بحالی کے لیے ایک بڑا اور اہم قدم اٹھاتے ہوئے سینئر اور جونیئر قومی ٹیموں کے لیے بین الاقوامی کوچنگ اسٹاف کا باقاعدہ اعلان کر دیا ہے۔

پی ایچ ایف کے مطابق، قومی ہاکی کی کارکردگی کو جدید خطوط پر استوار کرنے کے لیے ایک جامع ‘ہائی پرفارمنس کوچنگ ٹیم’ تشکیل دی گئی ہے۔ اس نئی پیش رفت کے تحت ڈیوڈ ڈوائر کو فٹنس اور ہائی پرفارمنس کوچ مقرر کیا گیا ہے، جبکہ گول کیپنگ کے شعبے میں بہتری لانے کے لیے باب جوہان ویلڈہوف کو گول کیپنگ کوچ کی ذمہ داریاں سونپی گئی ہیں۔ اس کے علاوہ، کھلاڑیوں کی ذہنی پختگی اور دباؤ سے نمٹنے کی صلاحیت کو بڑھانے کے لیے کرس بوون کو بطور اسپورٹس سائیکالوجسٹ ٹیم میں شامل کیا گیا ہے۔

دوسری جانب، جونیئر سطح پر نئے اور ابھرتے ہوئے کھلاڑیوں کو نکھارنے کے لیے عدنان ذاکر کو ‘جونیئر ٹیلنٹ آئیڈنٹی فکیشن کوچ’ کی اہم ذمہ داری دی گئی ہے، جبکہ ہالینڈ سے تعلق رکھنے والے ہرمن کروئس پہلے ہی قومی ٹیم کے ہیڈ کوچ کے طور پر اپنے فرائض سرانجام دے رہے ہیں۔

پاکستان ہاکی فیڈریشن کا کہنا ہے کہ یہ اعلیٰ تعلیم یافتہ اور تجربہ کار بین الاقوامی کوچنگ ٹیم پاکستان کی سینئر اور جونیئر دونوں ہاکی ٹیموں کے ساتھ مل کر کام کرے گی، جس کا مقصد پاکستان ہاکی کو ایک بار پھر عالمی سطح پر اس کا کھویا ہوا مقام دلانا ہے۔