غیر ملکی خواتین سے زیادتی اور اغواء کا کیس: ملزمان کا 5 روزہ جسمانی ریمانڈ منظور

لاہور کی مقامی عدالت نے غیر ملکی خواتین کے ساتھ مبینہ زیادتی اور اغوا کے سنگین مقدمے میں گرفتار چار ملزمان کو 5 روزہ جسمانی ریمانڈ پر پولیس کے حوالے کر دیا ہے۔ عدالت نے پولیس کو اگلی سماعت پر تفصیلی تفتیشی رپورٹ پیش کرنے کا بھی حکم دیا ہے۔

لاہور کی کینٹ کچہری کے جوڈیشل مجسٹریٹ اظہر محمود نے اس ہائی پروفائل کیس کی سماعت کی، جہاں ڈیفنس پولیس نے گرفتار کیے گئے چاروں ملزمان کو سخت سیکیورٹی میں عدالت کے روبرو پیش کیا۔

سماعت کے دوران سرکاری وکیل نے عدالت کو بتایا کہ ملزمان پر غیر ملکی خواتین کو اغوا کرنے اور ان کے ساتھ زیادتی جیسے گھناؤنے جرائم کا الزام ہے۔ انہوں نے موقف اختیار کیا کہ ملزمان کے اس مجرمانہ اقدام سے عالمی سطح پر ملکی بدنامی ہوئی ہے، اس لیے واقعے کی مکمل انکوائری اور شواہد اکٹھے کرنے کے لیے ملزمان کا 14 روزہ جسمانی ریمانڈ منظور کیا جائے۔

تاہم، فاضل عدالت نے پولیس کی 14 روزہ ریمانڈ کی استدعا کو مسترد کرتے ہوئے ملزمان کو 5 روز کے لیے جسمانی ریمانڈ پر پولیس کے حوالے کیا اور تفتیشی افسر کو پابند کیا کہ وہ آئندہ سماعت پر اب تک ہونے والی تفتیش کی کارکردگی رپورٹ عدالت میں جمع کرائیں۔ واضح رہے کہ ان ملزمان کے خلاف لاہور کے تھانہ ڈیفنس میں مقدمہ درج ہے، اور گرفتار ہونے والے ملزمان میں رضا ڈار، حسن رضا، سکندر خان اور ساجد علی شامل ہیں۔