کروڑوں ٹن ملبہ فلسطینیوں کیلئے گھروں کی دوبارہ تعمیر میں بڑی رکاوٹ بن بن گیا

غزہ شہر کے میئر رشدی السراج نے کہا ہے کہ اسرائیلی بمباری کے نتیجے میں غزہ کی پٹی میں جمع ہونے والا کروڑوں ٹن ملبہ فلسطینیوں کے لیے اپنے گھروں کی دوبارہ تعمیر اور بحالی کے کاموں میں سب سے بڑی رکاوٹ بن رہا ہے۔

قطری نشریاتی ادارے ‘الجزیرہ’ سے گفتگو کرتے ہوئے میئر غزہ رشدی السراج نے بتایا کہ اکتوبر 2023ء سے جاری اسرائیلی جارحیت کے باعث غزہ شہر اور دیگر علاقوں میں اس وقت تقریباً 6 کروڑ 80 لاکھ ٹن ملبہ جمع ہو چکا ہے۔ انہوں نے واضح کیا کہ ہر طرف تباہی کے آثار موجود ہیں جس سے معمولاتِ زندگی اور بحالی کا عمل شدید متاثر ہو رہا ہے۔

رشدی السراج کا کہنا تھا کہ بلدیہ کی اولین ترجیح ابتدا سے ہی سڑکوں سے ملبہ ہٹانا رہی ہے تاکہ ہنگامی امدادی گاڑیاں، بلدیاتی عملہ اور عام شہری آسانی سے نقل و حرکت کر سکیں۔ تاہم، اب سب سے بڑا چیلنج سرکاری، نجی اور تجارتی عمارتوں کے اس بھاری ملبے کو ٹھکانے لگانا ہے جو ہر طرف بکھرا ہوا ہے۔

میئر غزہ نے اقوامِ متحدہ (UN) اور دیگر بین الاقوامی امدادی و غیر سرکاری تنظیموں سے پرزور مطالبہ کیا ہے کہ وہ ملبہ ہٹانے کی کارروائیوں میں فوری اور تیز تر مدد فراہم کریں تاکہ متاثرہ فلسطینی شہری جلد از جلد اپنے گھروں کو لوٹ سکیں اور معمول کی زندگی کا آغاز کر سکیں۔ انہوں نے اصرار کیا کہ غزہ کے عوام کی سب سے بڑی خواہش اپنے گھروں میں واپسی اور زندگیوں کی بحالی ہے۔