جیل اور عدالتی نظام میں اصلاحات سے آسانیاں پیدا ہوں گی: وفاقی وزیر قانون

وفاقی وزیر قانون و انصاف اعظم نذیر تارڑ نے کہا ہے کہ حکومت قانون کی بالادستی پر کامل یقین رکھتی ہے اور جیلوں سمیت عدالتی نظام میں اصلاحات کے ذریعے عوام کے لیے آسانیاں پیدا کی جا رہی ہیں۔

سپریم کورٹ آف پاکستان میں جیل اصلاحات سے متعلق منعقدہ ایک کانفرنس سے خطاب کرتے ہوئے وفاقی وزیر قانون کا کہنا تھا کہ قیدیوں کے بنیادی حقوق کا تحفظ ہماری ترجیحات میں شامل ہے۔ انہوں نے واضح کیا کہ جیلوں میں قیدیوں کے لیے صحت، معیاری تعلیم اور فنی تربیت (وکیشنل ٹریننگ) کے حوالے سے سہولیات کی فراہمی کو ہر صورت یقینی بنایا جا رہا ہے تاکہ وہ معاشرے کے کارآمد شہری بن سکیں۔

اعظم نذیر تارڑ نے مزید کہا کہ عالمی تقاضوں اور انسانی حقوق کے بین الاقوامی اصولوں کے مطابق قیدیوں کے حقوق کو شفاف طریقے سے ڈیلیور کیا جارہا ہے۔ انہوں نے اس بات پر بھی زور دیا کہ ملک کے مجموعی نظامِ انصاف میں احتساب کے عمل کو بروقت، بلاامتیاز اور شفاف طریقے سے یقینی بنانے کے لیے سنجیدہ اقدامات کیے جا رہے ہیں۔