سرگودھا میں ڈکیتی کی واردات سے قبل 4 ڈاکو گرفتار، اسلحہ برآمد

پولیس نے مستعدی کا مظاہرہ کرتے ہوئے ڈکیتی کی ایک بڑی واردات کی کوشش کو ناکام بنا دیا اور جائے وقوعہ سے قبل ہی 4 مبینہ ڈاکوؤں کو رنگے ہاتھوں گرفتار کر کے ان کے قبضے سے غیر قانونی اسلحہ برآمد کر لیا ہے۔

پولیس حکام کے مطابق، شاہین آباد پولیس چوکی کی حدود میں 4 مشکوک افراد کسی بڑی ڈکیتی کی نیت سے گھات لگائے بیٹھے تھے۔ پولیس ٹیم نے مشکوک جان کر جب ان کی تلاشی لی، تو ملزمان کے قبضے سے 4 عدد 30 بور پستول برآمد ہوئے۔

پولیس حکام کا کہنا ہے کہ گرفتار ملزمان کی شناخت ندیم، سبحان، ہمایوں اور کاشف کے ناموں سے ہوئی ہے۔ ابتدائی تفتیش کے دوران ملزمان نے اعتراف کیا ہے کہ وہ علاقے میں ڈکیتی کی ایک بڑی واردات کی منصوبہ بندی کر رہے تھے۔ پولیس نے ملزمان کے خلاف باقاعدہ مقدمہ درج کر کے قانونی کارروائی کا آغاز کر دیا ہے، جبکہ واردات میں شامل ان کے دیگر مفرور ساتھیوں کو پکڑنے کے لیے بھی چھاپے مارے جا رہے ہیں۔