LIVE TV
Watch Now
Gold:
Intl: /g (22K) PK: /g (22K)
Stocks:
NY: ▲ ▼
China: ▲ ▼
Pakistan: ▲ ▼
India: ▲ ▼
TV ONE Logo
اہم خبریں
سرمایہ کاروں اور ٹیکنالوجی ماہرین کی توجہ دبئی پر مرکوز، بلاکچین لائف کانفرنس کی تیاریاں مکمل مشرق وسطیٰ پر پھر جنگ کے سائے، کویت میں ڈرون حملے، خطرے کے سائرن بج اٹھے روس، چین اور امریکا کے صدور کی ملاقات پوری دنیا کیلئے انتہائی اہم ہے، چینی کمیونسٹ پارٹی ایک ہفتے میں یوکرین کے روس پر 2 ہزار سے زائد حملے، بچے سمیت 10 شہری ہلاک ایرانی وزیر خارجہ کی قطری نمائندوں سے ملاقات، خطے میں کشیدگی کم کرنے پر زور دبئی میں ورلڈ آرٹ 2026ء کا آغاز 19 نومبر سے، 65 ممالک کے فنکار شریک ہوں گے امریکا، اسرائیل کے فوجی اڈوں کے قریب ڈیم اور بجلی گھر ہدف تصور ہونگے: ایران آبنائے ہرمز میں ایک دن میں تیسرا آئل ٹینکر بارودی سرنگوں سے ٹکرا گیا پاسداران انقلاب کی قدس فورس کے کمانڈر عراقی ملیشیا کا تنازع حل کرانے عراق پہنچ گئے دبئی میں تین روزہ عالمی کانفرنس، فوڈ سیفٹی کیلئے جدید سائنسی اقدامات پر تبادلہ خیال نیتن یاہو کی حکومت کے خاتمے کی راہ مزید ہموار، حزب اختلاف کے متان کہانا سپیکر منتخب امریکی سینیٹ کمیٹی نے نئے امریکی جوہری بم بی 94 کا نام ظاہر کردیا امریکی سکیورٹی ایجنسی کا انتہائی حساس اندرونی مواصلاتی نیٹ ورک فنی خرابی کے باعث بند روس کا فوجی مال بردار طیارہ سائبیریا میں گر کر تباہ، 19 افراد ہلاک پوتن، ٹرمپ اور شی جن پنگ کی ملاقات کا کچھ حصہ میڈیا کیلئے کھولا جاسکتا ہے، کریملن

سپریم کورٹ آف پاکستان کی میزبانی میں منعقدہ تاریخی جیل اصلاحات کانفرنس

Web Desk

2 July 2026

سپریم کورٹ آف پاکستان کی میزبانی میں منعقدہ تاریخی جیل اصلاحات کانفرنس کے اختتام پر ایک جامع مشترکہ اعلامیہ جاری کر دیا گیا ہے، جس پر چاروں صوبوں کے وزرائے اعلیٰ نے باقاعدہ دستخط کر کے اس کی توثیق کر دی ہے۔

اعلامیے میں ملک کے جیل خانوں کی ابتر صورتحال پر تشویش کا اظہار کرتے ہوئے کہا گیا ہے کہ پاکستان کی جیلیں اس وقت اپنی اصل گنجائش سے کہیں زیادہ قیدیوں کا بوجھ اٹھا رہی ہیں۔ اس کے ساتھ ساتھ جیلوں میں بنیادی ڈھانچے، صحت عامہ کی سہولیات، ذہنی صحت کی خدمات، قیدیوں کی بحالی، تعلیم اور پیشہ ورانہ تربیت کے مواقع بھی شدید حد تک ناکافی ہیں۔ سپریم کورٹ کے اعلامیے کے مطابق یہ چیلنجز نہ صرف جیلوں کے انتظام و انصرام میں رکاوٹ ہیں بلکہ انصاف تک رسائی، عوامی تحفظ، انسانی وقار اور قانون کی حکمرانی کو بھی بری طرح متاثر کرتے ہیں۔

مشترکہ اعلامیے میں اس بات پر زور دیا گیا ہے کہ بامعنی اور پائیدار جیل اصلاحات کے لیے ریاست کے تینوں ستونوں یعنی ایگزیکٹو (انتظامیہ)، عدلیہ اور مقننہ کے درمیان مربوط اقدامات ناگزیر ہیں، تاہم جیلوں کے انتظام، وسائل کی فراہمی اور اصلاحات کی بنیادی ذمہ داری صوبائی حکومتوں پر عائد ہوتی ہے۔ اعلامیے کے مطابق غیر ضروری قید میں کمی لانے، جیلوں میں گنجائش سے زائد قیدیوں کے دیرینہ مسئلے کو حل کرنے اور جیل انتظامیہ کو آئینی و انسانی حقوق کے تقاضوں سے ہم آہنگ بنانے کے لیے مؤثر اقدامات کیے جائیں گے۔

مزید برآں، اعلامیے میں قیدیوں کے لیے حفظانِ صحت، معیاری غذائیت، طبی و ذہنی علاج کی سہولیات، شکایات کے فوری ازالے اور جیلوں میں تشدد و بدسلوکی سے تحفظ کے اقدامات کو بہتر بنانے پر زور دیا گیا ہے۔ تمام اسٹیک ہولڈرز نے اس بات پر اتفاق کیا کہ قیدیوں کی تعلیم، پیشہ ورانہ تربیت، نفسیاتی معاونت، منشیات کے عادی افراد کے علاج، مہارتوں کی نشوونما اور رہائی کے بعد ان کی معاشرے میں بحالی کے پروگرامز کو وسعت دی جائے گی۔

اعلامیے کے مطابق، جیل اصلاحات کے اس متفقہ قومی میکانزم پر عملدرآمد کی پیش رفت سے متعلق باقاعدگی سے رپورٹ پیش کی جائے گی۔ اختتامی نوٹ میں اس عزم کا اعادہ کیا گیا کہ جیل اصلاحات محض ایک انتظامی ضرورت نہیں بلکہ یہ آئینی، انسانی اور عوامی تحفظ کا اہم تقاضا ہیں، اور ملک میں ایک ایسا جیل نظام تشکیل دیا جائے گا جو مکمل طور پر قانونی، انسانی اور بحالی کے اصولوں پر مبنی ہو۔