مون سون بارشوں کے پیش نظر سکولوں کے لیے حفاظتی ہدایات جاری

ایجوکیشن اتھارٹی لاہور نے مون سون کے برسات کے سیزن کے پیشِ نظر تمام سرکاری اور نجی اسکولوں کے لیے اہم حفاظتی ہدایات جاری کر دی ہیں اور تمام تعلیمی اداروں کو فوری طور پر حفاظتی اقدامات یقینی بنانے کا حکم دیا ہے۔

جاری کردہ سرکاری مراسلے کے مطابق، تمام نجی و سرکاری اسکول اپنی عمارتوں، کلاس رومز، چھتوں، باؤنڈری والز اور گیٹس کی فوری طور پر حفاظتی جانچ (فٹنس چیکنگ) کرائیں۔ خستہ حال یا غیر محفوظ عمارتوں میں فٹنس سرٹیفکیٹ حاصل کرنے تک تمام تدریسی سرگرمیاں فوری طور پر معطل رکھی جائیں۔ ایجوکیشن اتھارٹی نے اسکولوں کی انتظامیہ کو یہ بھی ہدایت کی ہے کہ وہ بارش کے پانی کی نکاسی کے مؤثر انتظامات کریں، اسکول میں بجلی کی وائرنگ، سوئچ بورڈز اور دیگر برقی آلات کی فوری چیکنگ کروا کر خراب کنکشنز کی مرمت کو یقینی بنائیں تاکہ کرنٹ لگنے جیسے واقعات سے بچا جا سکے۔

مراسلے میں مزید کہا گیا ہے کہ شدید بارش، آندھی، گرج چمک اور تیز ہواؤں کے دوران طلبہ اور اسکول کے عملے کو غیر ضروری طور پر عمارت سے باہر نہ جانے دیا جائے۔ اسکولوں کے احاطے میں موجود درختوں کی کانٹ چھانٹ، کمزور شاخوں کی تلفی، چھتوں، سیڑھیوں، راہداریوں اور کھیل کے میدانوں کو پھسلن اور ہر قسم کی رکاوٹوں سے پاک رکھا جائے۔

ایجوکیشن اتھارٹی نے تمام تعلیمی اداروں کو پابند کیا ہے کہ وہ اسکول میں فرسٹ ایڈ کٹ کی دستیابی اور ہنگامی رابطہ نمبرز کو نمایاں جگہوں پر آویزاں رکھیں۔ کسی بھی حادثے یا ہنگامی صورتحال کی صورت میں فوری طور پر متعلقہ حکام کو مطلع کیا جائے اور محکمہ موسمیات کی جاری کردہ وارننگز پر سختی سے عمل درآمد کیا جائے۔ مراسلے میں واضح کیا گیا ہے کہ ان حفاظتی ہدایات پر عمل نہ کرنے اور غفلت برتنے والے تعلیمی اداروں کے خلاف سخت قانونی کارروائی عمل میں لائی جائے گی