آزاد کشمیر کے ہر ضلع میں انتخابی مہم چلاؤں گا: بلاول بھٹو زرداری

پاکستان پیپلزپارٹی کے چیئرمین بلاول بھٹو زرداری نے اعلان کیا ہے کہ وہ آزاد جموں و کشمیر کے  انتخابات کے سلسلے میں ریاست کے ہر ضلع کا دورہ کریں گے اور خود انتخابی مہم چلائیں گے۔

یہ بات انہوں نے آزاد جموں و کشمیر کے وزیراعظم اور پیپلزپارٹی آزاد کشمیر کے صدر چوہدری انوار الحق اور جنرل سیکریٹری فیصل ممتاز راٹھور سے ملاقات کے دوران کہی۔ ملاقات میں آزاد کشمیر کے انتخابات اور انتخابی مہم کی تیاریوں پر تفصیلی تبادلہ خیال کیا گیا، جبکہ پیپلزپارٹی آزاد کشمیر کی قیادت نے چیئرمین کو انتخابی تیاریوں کے حوالے سے اہم بریفنگ بھی دی۔

اس موقع پر گفتگو کرتے ہوئے بلاول بھٹو زرداری نے کہا کہ آزاد جموں و کشمیر کے عوام ان کے دل کے قریب ہیں۔ انہوں نے یاد دلایا کہ مسئلہ کشمیر پر ہی پاکستان پیپلزپارٹی کی بنیاد رکھی گئی تھی اور انہوں نے خود عالمی سطح پر کشمیر کا مقدمہ بھرپور انداز میں اٹھایا ہے۔

چیئرمین پیپلزپارٹی نے واضح کیا کہ کشمیری عوام کے مسائل کے حل کے لیے ان کی پارٹی ہمیشہ ساتھ کھڑی ہے۔ انہوں نے پارٹی رہنماؤں کو گائیڈ لائنز دیتے ہوئے ہدایت کی کہ انتخابی مہم کے دوران عوام سے رابطوں کا عمل مزید تیز کیا جائے اور پاکستان پیپلزپارٹی کا منشور ریاست کے گھر گھر تک پہنچایا جائے