باپ نے بیوی سے جھگڑے کے بعد دو کمسن بچوں کو قتل کر دیا

پنجاب کے ضلع فیصل آباد کے علاقے ماموں کانجن میں گھریلو تنازع ایک انتہائی المناک اور دل دہلا دینے والے سانحے میں تبدیل ہو گیا، جہاں ایک سفاک باپ نے اپنی بیوی سے جھگڑے کے بعد غصے میں آ کر اپنے ہی دو کمسن بچوں کو بیدردی سے قتل کر دیا۔

پولیس کے مطابق، ملزم آصف کی اہلیہ شازیہ گھریلو ناچاقی کے باعث ناراض ہو کر اپنے میکے چلی گئی تھی، جس کے بعد ملزم نے مبینہ طور پر شدید طیش میں آ کر گھر میں موجود اپنے دونوں بچوں پر چھریوں کے پے در پے وار کیے اور انہیں موت کے گھاٹ اتار دیا۔ پولیس کا کہنا ہے کہ مقتول بچوں میں 8 سالہ دعا فاطمہ اور 6 سالہ احمد شامل ہیں، جو اپنے سگے باپ کے ظلم کا نشانہ بنے۔

افسوسناک واقعے کے بعد ملزم موقع واردات سے فرار ہونے میں کامیاب ہو گیا۔ پولیس نے اطلاع ملتے ہی جائے وقوعہ پر پہنچ کر دونوں بچوں کی لاشوں کو اپنی تحویل میں لیا اور ضروری قانونی کارروائی کا آغاز کر دیا۔ پولیس حکام کا کہنا ہے کہ مفرور ملزم آصف کی گرفتاری کے لیے مختلف ممکنہ ٹھکانوں پر چھاپے مارے جا رہے ہیں اور اسے جلد ہی گرفتار کر لیا جائے گا۔