وفاق المدارس العربیہ کے انتخابات؛ مفتی تقی عثمانی بلامقابلہ صدر اور قاری حنیف جالندھری ناظمِ اعلیٰ منتخب

جامعہ دارالعلوم کراچی میں وفاق المدارس العربیہ پاکستان کی مجلس عاملہ، مجلس شوریٰ اور مجلس عمومی کا ایک اہم مشترکہ انتخابی اجلاس منعقد ہوا، جس میں ملک بھر سے ایک ہزار سے زائد جید علماء کرام اور ارکان نے شرکت کی۔ اجلاس میں مولانا فضل الرحمٰن کی تجویز پر، وفاق کی 70 سالہ تاریخی روایت کو برقرار رکھتے ہوئے، ممتاز عالمِ دین مولانا مفتی محمد تقی عثمانی کو بلامقابلہ دوسری مرتبہ صدر جبکہ مولانا محمد حنیف جالندھری کو مسلسل ساتویں مرتبہ بلامقابلہ ناظمِ اعلیٰ منتخب کر لیا گیا۔ دونوں قائدین آئندہ 5 سالہ مدت کے لیے ملک کے سب سے بڑے دینی تعلیمی بورڈ کی قیادت سنبھالیں گے۔ یکم اور 2 جولائی کو ہونے والے ان اجلاسوں میں شرکاء نے نو منتخب قیادت کی علمی، تنظیمی اور انتظامی خدمات کو سراہتے ہوئے امید ظاہر کی کہ ان کی بصیرت سے وفاق المدارس تعلیمی و دینی میدان میں مزید ترقی کرے گا۔