صدرِ آصف علی زرداری کا متحدہ عرب امارات کے قومی دن پر تہنیتی پیغام

صدر آصف علی زرداری نے متحدہ عرب امارات کے قومی دن پر اماراتی قیادت اور عوام کے نام خصوصی تہنیتی پیغام جاری کیا ہے۔

صدر مملکت نے اپنے پیغام میں کہا کہ پاکستان اور متحدہ عرب امارات کے تاریخی اور برادرانہ تعلقات وقت کے ساتھ مزید مضبوط ہو رہے ہیں۔ انہوں نے فخر کا اظہار کرتے ہوئے کہا کہ پاکستان 1971 میں یو اے ای کو تسلیم کرنے والا پہلا ملک تھا اور دونوں ممالک کے درمیان رشتے مشترکہ مذہب، باہمی اعتماد اور نسل در نسل قائم تعلقات پر مبنی ہیں۔صدر آصف زرداری نے کہا کہ ان کے خاندان کا چار نسلوں پر محیط خصوصی تعلق یو اے ای سے جڑا ہوا ہے۔ انہوں نے بتایا کہ بیگم نصرت بھٹو نے اپنی زندگی کے آخری ایام یو اے ای میں گزارے جبکہ شہید محترمہ بینظیر بھٹو نے مشکل برسوں میں امارات میں جلاوطنی اختیار کی۔ صدر نے کہا کہ ان کی بیٹی آج یو اے ای کو اپنا گھر بنا چکی ہے۔صدر مملکت نے اماراتی قیادت کے ساتھ دیرینہ اور گرم جوش تعلقات کو مثالی قرار دیتے ہوئے کہا کہ تجارت، سرمایہ کاری اور دفاع کے شعبوں میں دوطرفہ تعاون کے مزید بڑھنے کا یقین ہے۔انہوں نے کہا کہ امارات میں مقیم پاکستانی کمیونٹی دونوں ممالک کے درمیان ایک مضبوط پل کا کردار ادا کر رہی ہے۔
صدرِ پاکستان نے متحدہ عرب امارات کی قیادت اور عوام کے لیے امن، ترقی اور خوشحالی کی دعا کرتے ہوئے کہا کہ پاکستان یو اے ای کے ساتھ شراکت داری مزید گہری کرنے کا خواہاں ہے