کراچی: گھریلو ملازمہ ریٹائرڈ ایف بی آر افسر کے گھر سے 40 لاکھ کی چوری کر کے فرار

عزیز آباد کے علاقے میں ایک گھریلو ملازمہ ریٹائرڈ ایف بی آر (FBR) افسر کے گھر سے 40 لاکھ روپے سے زائد مالیت کی نقدی اور سونا چوری کر کے باآسانی فرار ہوگئی۔

ابتدائی تحقیقات کے مطابق، گھریلو ملازمہ نے گھر میں موجود 40 لاکھ روپے سے زائد مالیت کے سونے کے زیورات اور نقدی پر ہاتھ صاف کیا۔ متاثرہ خاندان نے پولیس کو بتایا کہ محض 6 روز قبل ہی اس ملازمہ کو گھر میں موجود کینسر کی ایک مریضہ کی تیمارداری اور دیکھ بھال کے لیے کام پر رکھا گیا تھا۔ پولیس نے واقعے کا مقدمہ درج کر کے باقاعدہ تفتیش کا آغاز کر دیا ہے۔

پولیس حکام نے واقعے کے حوالے سے اہم انکشاف کرتے ہوئے بتایا کہ مذکورہ گھریلو ملازمہ نے ملازمت حاصل کرتے وقت اپنا شناختی کارڈ فراہم نہیں کیا تھا اور گھر والوں کو اپنا پتہ (ایڈریس) بھی غلط لکھوایا تھا۔ تحقیقات میں یہ بات سامنے آئی ہے کہ ملزمہ فلیٹ کے مین گیٹ پر تعینات چوکیدار کے پاس کام مانگنے آئی تھی، جس پر چوکیدار نے اسے متاثرہ اہلخانہ سے ملوایا اور انہوں نے بغیر کسی تصدیق کے اسے کام پر رکھ لیا۔ پولیس اب چوکیدار کے بیانات اور اردگرد کے سی سی ٹی وی کیمروں کی مدد سے ملزمہ کی تلاش شروع کر دی ہے۔