بھارتی نیوز چینلز ہیک، نشریات کے دوران پاکستانی قومی ترانہ چلنے لگا

بھارت کے دو معروف نیوز چینلز کی نشریات مبینہ طور پر ہیک ہونے اور لائیو اسٹریمنگ کے دوران پاکستان کا قومی ترانہ نشر کیے جانے کے دعوے سامنے آئے ہیں۔ اس واقعے کے بعد سوشل میڈیا پر مختلف ویڈیوز تیزی سے گردش کر رہی ہیں، تاہم حکام یا چینل انتظامیہ کی جانب سے ابھی تک ان دعوؤں کی باضابطہ تصدیق یا تردید سامنے نہیں آئی۔

رپورٹس کے مطابق یہ مبینہ واقعہ بھارت کے مقبول علاقائی چینلز ‘ٹی وی 9 تیلگو’ (TV9 Telugu) اور ‘فریڈم ٹی وی کنڑ’ (Freedom TV Kannada) کے ساتھ پیش آیا۔ دعویٰ کیا گیا ہے کہ بھارتی صدر کی اہم تقریر کے دوران دونوں چینلز کی نشریات اچانک متاثر ہوئیں اور چند لمحوں کے لیے پاکستان کا قومی ترانہ گونج اٹھا۔

اطلاعات کے مطابق نشریات ہیک کرنے والے عناصر کی جانب سے اسکرین پر ایک پیغام بھی فلیش کیا گیا، جس میں مبینہ طور پر تنبیہ کی گئی تھی کہ “پاکستان کے ساتھ چھیڑ چھاڑ نہ کی جائے. اس واقعے کے فوراً بعد دونوں چینلز کی لائیو نشریات میں خلل پڑنے کی اطلاعات موصول ہوئیں، جس نے سوشل میڈیا پر قیاس آرائیوں کا بازار گرم کر دیا۔ واضح رہے کہ ‘ٹی وی 9 تیلگو’ کے سوشل میڈیا پلیٹ فارمز پر تقریباً 1 کروڑ 40 لاکھ (14 ملین) جبکہ ‘فریڈم ٹی وی کنڑ’ کے 1 ملین (10 لاکھ) سے زائد فالوورز موجود ہیں۔ سائبر سکیورٹی کے ماہرین اور مبصرین کا کہنا ہے کہ اگر یہ واقعہ درست ثابت ہوتا ہے تو یہ بھارتی میڈیا انڈسٹری کے سائبر سکیورٹی اور تحفظ کے نظام پر ایک بہت بڑا سوالیہ نشان ہے۔ تاہم، ہیکنگ کی اصل نوعیت، اس کے پیچھے کارفرما عناصر اور دیگر تفصیلات کے حوالے سے تاحال کوئی باضابطہ اور حتمی بیان جاری نہیں کیا گیا ہے۔