مشیر وزیراعلیٰ پنجاب ذیشان ملک سانحہ کاہنہ میں جاں بحق معصوم بچوں کے گھر پہنچ گئے

وزیراعلیٰ پنجاب مریم نواز شریف کی خصوصی ہدایت پر ان کے مشیر ذیشان ملک اعلیٰ حکام کے ہمراہ سانحہ کاہنہ میں جاں بحق ہونے والے معصوم بچوں کے گھر پہنچ گئے۔

کاہنہ میں ٹیوشن سینٹر کی چھت گرنے کے باعث ہونے والے المناک حادثے کے بعد آہوں، سسکیوں اور سوگوار فضا میں ذیشان ملک نے متاثرہ خاندانوں سے ملاقات کی اور ان سے دلی تعزیت اور ہمدردی کا اظہار کیا۔ انہوں نے مصیبت کی اس کٹھن گھڑی میں غمزدہ اہلِ خانہ کو دلاسہ دیتے ہوئے کہا کہ حکومتِ پنجاب آپ کے اس عظیم غم میں برابر کی شریک ہے اور ہم آپ کو بالکل تنہا نہیں چھوڑیں گے۔

مشیر وزیراعلیٰ کا کہنا تھا کہ وزیراعلیٰ مریم نواز اس ہولناک سانحے پر خود انتہائی رنجیدہ اور افسردہ ہیں۔ انہوں نے متاثرہ خاندانوں کو یقین دلایا کہ حکومت کی جانب سے ان کی ہر ممکن مدد کی جائے گی اور مشکل کے اس وقت میں انتظامیہ ان کے ساتھ کھڑی ہے۔