بلوچستان بھر میں 35 نئے اسسٹنٹ کمشنرز اور 3 قائم مقام اسسٹنٹ کمشنرز تعینات

بلوچستان حکومت نے صوبے بھر کی ضلعی انتظامیہ میں بڑی تبدیلیاں کرتے ہوئے 35 نئے اسسٹنٹ کمشنرز (ACs) اور 3 قائم مقام اسسٹنٹ کمشنرز تعینات کر دیے ہیں۔ چیف سیکرٹری بلوچستان کی باضابطہ منظوری کے بعد محکمہ سروسز اینڈ جنرل ایڈمنسٹریشن (S&GAD) نے ان تقرریوں کا باضابطہ نوٹیفکیشن جاری کر دیا ہے۔

اعلامیے کے مطابق، صوبے کے تمام اہم ڈویژنز بشمول کوئٹہ، قلات، مکران، سبی، ژوب اور نصیرآباد کے مختلف اضلاع اور تحصیلوں میں نئے افسران کی تعیناتیاں عمل میں لائی گئی ہیں۔ حکومت کا مؤقف ہے کہ ان بڑے پیمانے پر کی جانے والی تعیناتیوں کا بنیادی مقصد ضلعی سطح پر انتظامی امور کو مزید مؤثر، شفاف اور فعال بنانا ہے تاکہ عوام کو ریلیف فراہم کیا جا سکے۔

محکمہ ایس اینڈ جی اے ڈی کی جانب سے جاری کردہ نوٹیفکیشن میں نئی شرائط بھی وضع کی گئی ہیں، جس کے تحت انڈر ٹریننگ اسسٹنٹ کمشنرز (AC under training) کے لیے فیلڈ میں تعیناتی کی کم از کم مدت ایک سال لازمی ہوگی۔ اس کے علاوہ، ان افسران کی مستقل سروس کی توثیق کو ان کی کارکردگی کی فیلڈ رپورٹ سے مشروط کیا گیا ہے۔

دوسری جانب، بلوچستان حکومت نے انتظامی افسران کو سخت پیغام دیتے ہوئے واضح کیا ہے کہ فرائض کی انجام دہی کے دوران بدعنوانی (کرپشن)، کسی بھی قسم کا غیر ضروری اثر و رسوخ اور ضابطہ اخلاق کی خلاف ورزی کسی بھی صورت برداشت نہیں کی جائے گی اور ایسے عناصر کے خلاف فوری تادیبی کارروائی عمل میں لائی جائے گی۔