شہر قائد میں سڑکوں، پلوں، فلائی اوورز کی تعمیر و بحالی جاری رہی گی: میئر کراچی

میئر کراچی بیرسٹر مرتضیٰ وہاب نے کہا ہے کہ نئے مالیاتی بجٹ میں کراچی کے دیرینہ شہری مسائل کے حل کو اولین ترجیح دی گئی ہے اور شہر میں انفراسٹرکچر کی بہتری کے لیے سڑکوں، پلوں اور فلائی اوورز کی تعمیر و بحالی کا عمل تیز رفتاری سے جاری رہے گا۔

کے ایم سی کونسل ہال میں خطاب کرتے ہوئے میئر کراچی مرتضیٰ وہاب کا کہنا تھا کہ ہماری ہمیشہ یہ مخلصانہ کوشش رہی ہے کہ دستیاب وسائل کے اندر رہتے ہوئے شہر قائد کی بہترین خدمت کی جا سکے۔ انہوں نے افسوس کا اظہار کرتے ہوئے کہا کہ شہر کے بارے میں اکثر یہ منفی تاثر دیا جاتا ہے کہ یہاں کام نہیں ہو رہا، جبکہ حقیقت اس کے برعکس ہے اور ریکارڈ ترقیاتی کام کروائے گئے ہیں۔

میئر کراچی نے اب تک مکمل ہونے والے ترقیاتی منصوبوں کے اعداد و شمار پیش کرتے ہوئے کہا کہ شہر بھر کی اہم شاہراہوں پر 31 لاکھ اسکوائر فٹ سے زائد پیچ ورک مکمل کیا جا چکا ہے۔ مختلف علاقوں اور گلیوں میں 1 کروڑ 23 لاکھ اسکوائر فٹ سے زائد پیور بلاکس بچھائے گئے ہیں۔ شہر کے نکاسی آب کے نظام کو بہتر بنانے کے لیے 4 لاکھ رننگ فٹ سے زائد سیوریج کا کام مکمل کیا گیا ہے۔ انہوں نے مزید کہا کہ نرسری فلائی اوور، جناح برج اور شہید ملت روڈ جیسے اہم منصوبوں کی تعمیر و بحالی کا کام کامیابی سے مکمل کر لیا گیا ہے، جبکہ عظیم پورہ فلائی اوور کو ریکارڈ 93 دنوں کی قلیل مدت میں مکمل کر کے عوام کے لیے کھول دیا گیا ہے۔ مرتضیٰ وہاب نے عزم کا اعادہ کیا کہ کراچی کی ترقی کا یہ سفر مستقبل میں بھی اسی جذبے کے ساتھ جاری رہے گا