سندھ اسمبلی نے مالی سال27-2026 کا بجٹ کثرت رائے سے منظور کرلیا

سندھ اسمبلی نے مالی سال 27-2026 کا کل حجم 3 ہزار 652 ارب روپے کا صوبائی بجٹ کثرتِ رائے سے منظور کر لیا ہے۔ یہ بجٹ وزیراعلیٰ سندھ مراد علی شاہ نے ایوان میں پیش کیا تھا۔

بجٹ کی منظوری کے عمل کے دوران وزیراعلیٰ سندھ مراد علی شاہ نے تمام مطالباتِ زر ایک ساتھ ملا کر ایوان میں پیش کیے، جسے ارکان نے کثرتِ رائے سے منظور کر لیا۔ ضمنی بجٹ میں 88 مطالباتِ زر پر اپوزیشن کی جانب سے 300 سے زائد کٹوتی کی تحاریک پیش کی گئیں، جنہیں مسترد کر دیا گیا۔

اپوزیشن کی طرف سے نیشنل گیمز کے مطالباتِ زر میں کٹوتی کی تحریک پیش کی گئی تو وزیراعلیٰ سندھ نے اس کی سخت مخالفت کی۔ انہوں نے ایوان کو بتایا کہ نیشنل گیمز کے مہمانِ خصوصی چیف آف ڈیفنس فورسز تھے، اس لیے اس میں کٹوتی مناسب نہیں ہے۔ اس کے علاوہ ‘میرا لیاری’ فلم کے لیے مطالبہ زر میں کٹوتی کی تحریک بھی مسترد کر دی گئی۔ مراد علی شاہ نے اس پر فخر کا اظہار کرتے ہوئے کہا کہ سندھ ملک کا پہلا صوبہ ہے جس نے خود فلم بنائی ہے، جو دنیا بھر میں سندھ کا مثبت چہرہ دکھا رہی ہے۔

وزیراعلیٰ سندھ نے بجٹ کی خصوصیات پر روشنی ڈالتے ہوئے واضح کیا کہ عوام پر بوجھ ڈالے بغیر اس نئے بجٹ میں کوئی نیا ٹیکس نہیں لگایا گیا۔ بجٹ کی منظوری کا عمل مکمل ہونے کے بعد سندھ اسمبلی کا اجلاس غیر معینہ مدت کے لیے ملتوی کر دیا گیا۔ واضح رہے کہ نئے مالی سال کے بجٹ میں سندھ کے سرکاری ملازمین کی تنخواہوں اور پنشن میں 7 فیصد اضافہ کیا جا رہا ہے، جبکہ صوبے میں غریب اور محنت کش طبقے کے لیے کم از کم اجرت 40 ہزار روپے سے بڑھا کر 43 ہزار روپے ماہانہ مقرر کی گئی ہے۔