کراچی پورٹ ٹرسٹ نے 138 سالہ تاریخ میں کارگو ہینڈلنگ کا نیا ریکارڈ قائم کر دیا

راچی پورٹ ٹرسٹ (KPT) نے اپنی تاریخ کا ایک نیا سنگِ میل عبور کرتے ہوئے کارگو ہینڈلنگ کا 138 سالہ پرانا ریکارڈ توڑ دیا ہے۔ وفاقی وزیر برائے بحری امور جنید انوار چوہدری نے اس تاریخی کامیابی کا اعلان کرتے ہوئے اسے ملکی بحری شعبے کی ترقی کا واضح ثبوت قرار دیا ہے۔

وفاقی وزیر جنید انوار چوہدری کے مطابق، کراچی پورٹ ٹرسٹ نے رواں سال 5 کروڑ 46 لاکھ 85 ہزار ٹن کارگو ہینڈلنگ کا اپنا سابقہ ریکارڈ عبور کر کے ایک نیا عالمی معیار قائم کیا ہے۔ انہوں نے کہا کہ یہ غیر معمولی کامیابی وزارتِ بحری امور اور کے پی ٹی کی ٹیم کی انتھک محنت کا نتیجہ ہے۔ ان کا مزید کہنا تھا کہ پاکستان کو خطے کا ایک مضبوط بحری اور تجارتی مرکز (میری ٹائم ہب) بنانے کے لیے جامع اصلاحات کا سلسلہ تیزی سے جاری ہے، اور ملک کی بندرگاہوں کو جدید ترین خطوط پر استوار کرنے اور ان کی توسیع کے لیے اقدامات کو مزید تیز کر دیا گیا ہے۔

اس موقع پر چیئرمین کے پی ٹی، ایڈمرل شاہد احمد نے کارکردگی پر روشنی ڈالتے ہوئے کہا کہ کراچی پورٹ کی بین الاقوامی سطح پر مسابقتی صلاحیت کو بڑھانے کے لیے اقدامات مستقبل میں بھی جاری رہیں گے۔ انہوں نے واضح کیا کہ پورٹ کی مجموعی استعداد کار، آپریشنل کارکردگی اور انتظامی صلاحیتوں میں نمایاں بہتری آئی ہے، جس کی بدولت اتنے بڑے پیمانے پر کارگو کی نقل و حمل کو ریکارڈ وقت میں ممکن بنایا گیا۔