آزاد جموں و کشمیر قانون ساز اسمبلی انتخابات، پی پی اور جے یو آئی کا سیاسی اتحاد کا اعلان

پاکستان پیپلزپارٹی (PPP) اور جمعیت علمائے اسلام (JUI) نے آزاد جموں و کشمیر قانون ساز اسمبلی کے آئندہ عام انتخابات کے لیے باضابطہ طور پر سیاسی و انتخابی اتحاد کا اعلان کر دیا ہے۔

اسلام آباد میں دونوں جماعتوں کے آزاد کشمیر کے قائدین نے مشترکہ پریس کانفرنس کرتے ہوئے اس اہم فیصلے سے میڈیا کو آگاہ کیا۔ اس موقع پر پیپلز پارٹی آزاد کشمیر کے رہنما چوہدری یاسین کا کہنا تھا کہ ہم جے یو آئی کے ساتھ ایک مضبوط سیاسی اتحاد قائم کرنے جا رہے ہیں، جس سے ریاست کی سیاست پر گہرے اثرات مرتب ہوں گے اور اس اتحاد سے دونوں جماعتوں کو بھرپور فائدہ پہنچے گا۔ انہوں نے مزید کہا کہ پیپلز پارٹی کی مرکزی قیادت نے ہمیشہ ہر عالمی اور ملکی فورم پر مسئلہ کشمیر کو بھرپور انداز میں اجاگر کیا ہے۔ چوہدری یاسین نے سیٹ ایڈجسٹمنٹ کی تفصیلات بتاتے ہوئے اعلان کیا کہ حلقہ ایل اے 14 اور ایل اے 23 پر جمعیت علمائے اسلام کے امیدوار دونوں پارٹیوں کے متفقہ اور مشترکہ امیدوار ہوں گے۔

پریس کانفرنس سے خطاب کرتے ہوئے جے یو آئی آزاد کشمیر کے امیر مولانا سعید یوسف نے اس اتحاد کو تاریخی قرار دیتے ہوئے کہا کہ آج آزاد جموں و کشمیر کی تاریخ میں پہلی بار ہمارا پیپلز پارٹی کے ساتھ باقاعدہ انتخابی اتحاد ہوا ہے۔ انہوں نے فارمولے کی وضاحت کرتے ہوئے بتایا کہ پیپلز پارٹی ان دو حلقوں (ایل اے 14 اور ایل اے 23) میں جے یو آئی کے امیدواروں کی مکمل بلامشروط حمایت کرے گی، جبکہ اس کے بدلے میں ریاست کے دیگر تمام حلقوں میں جے یو آئی کے کارکنان اور ووٹرز پیپلز پارٹی کے امیدواروں کو سپورٹ کریں گے۔ واضح رہے کہ آزاد کشمیر قانون ساز اسمبلی کے عام انتخابات 27 جولائی کو منعقد ہونے جا رہے ہیں، اور اس اتحاد کے بعد ریاست کا سیاسی منظر نامہ انتہائی دلچسپ ہو گیا ہے۔