لاہور میں خاتون ٹیچر سے مبینہ اجتماعی زیادتی، سکیورٹی گارڈ سمیت 2 ملزمان گرفتار

صوبائی دارالحکومت کے علاقے لیاقت آباد میں اسکول کی خاتون ٹیچر پر مبینہ تشدد اور اجتماعی زیادتی کا انتہائی افسوسناک واقعہ سامنے آیا ہے، جس پر فوری کارروائی کرتے ہوئے پولیس نے اسکول کے سکیورٹی گارڈ اور اس کے ساتھی کو گرفتار کر لیا ہے۔

ایس پی ماڈل ٹاؤن اسد علی کے مطابق، گرفتار ملزمان کی شناخت اسکول کے سکیورٹی گارڈ محسن اور اس کے ساتھی اسد کے ناموں سے ہوئی ہے۔ ابتدائی تحقیقات سے معلوم ہوا ہے کہ اسکول کا سکیورٹی گارڈ محسن چھٹی کے بعد خاتون ٹیچر کو باتوں میں ورغلا کر اپنے دوست کے گھر لے گیا، جہاں دونوں ملزمان نے خاتون کو نشہ آور یا بے ہوشی کی دوا پلائی اور مبینہ طور پر اجتماعی زیادتی کا نشانہ بنایا۔

پولیس حکام کا کہنا ہے کہ جب متاثرہ خاتون کو ہوش آیا تو ملزمان نے انہیں زبردستی گھر سے باہر نکال دیا اور خود موقع سے فرار ہو گئے۔ ایس پی اسد علی نے بتایا کہ متاثرہ خاتون کے والد کی مدعیت میں تھانے میں دونوں ملزمان کے خلاف مقدمہ درج کر لیا گیا ہے اور دونوں کو حراست میں لے کر مزید تفتیش شروع کر دی گئی ہے۔ انہوں نے واضح کیا کہ خواتین کا استحصال کرنے والے درندے کسی بھی رعایت کے مستحق نہیں ہیں اور پولیس ملزمان کو قانون کے مطابق سخت سے سخت سزا دلوانا یقینی بنائے گی۔