واٹس ایپ نے صارفین کیلئے جدید حفاظتی فیچر متعارف کرا دیا

دنیا کی مقبول ترین میسجنگ ایپ واٹس ایپ نے اپنے صارفین کی سکیورٹی کو مزید مضبوط بناتے ہوئے ایک جدید حفاظتی فیچر متعارف کرایا ہے، جو نامعلوم نمبرز سے آنے والے پیغامات کی حقیقت چیٹ کھولنے سے پہلے ہی آشکار کر دے گا۔میٹا کی زیرِ ملکیت میسجنگ ایپ اب کسی بھی انجان نمبر سے چیٹ شروع ہونے سے قبل ہی صارف کو ایک اہم انتباہ (وارننگ) جاری کرے گی۔ اس فیچر کا بنیادی مقصد صارفین کو ممکنہ فراڈ اور مالیاتی گھپلے کرنے والوں سے ہوشیار کرنا ہے، تاکہ وہ کسی بھی غیر متوقع رابطے پر فوری ردعمل دینے کے بجائے پہلے سوچ بچار کر سکیں۔ واٹس ایپ کی جانب سے یہ اہم اپ ڈیٹ اینڈرائیڈ اور آئی او ایس (iOS) دونوں پلیٹ فارمز کے لیے بیک وقت جاری کی جا رہی ہے۔کمپنی کے حکام نے واضح کیا کہ یہ نیا فیچر صارف کو بتائے گا کہ متعلقہ نمبر کس ملک میں رجسٹرڈ ہے، کیا اسے کانٹیکٹ لسٹ میں محفوظ کرنا مناسب ہے اور کیا دونوں افراد پہلے سے کسی مشترکہ گروپ میں شامل ہیں یا نہیں۔ اس سکیورٹی سسٹم کے ذریعے چیٹ کھولنے سے پہلے ملنے والی معلومات سے صارف خود یہ فیصلہ کر سکے گا کہ آیا اسے پیغام کا جواب دینا ہے، یا اس نمبر کو بلاک اور رپورٹ کرنا ہے۔

اس فیچر کی سب سے دلچسپ بات یہ ہے کہ اس تمام عمل کے دوران میسج بھیجنے والے شخص کو کسی قسم کی اطلاع نہیں ملے گی، جس سے صارف کی پرائیویسی مکمل طور پر برقرار رہے گی۔واضح رہے کہ آن لائن سکیمرز اکثر خود کو قریبی واقف کار ظاہر کر کے نیا نمبر ہونے کا دعویٰ کرتے ہیں، جس کا فائدہ اٹھاتے ہوئے وہ معصوم صارفین کو دھوکا دیتے ہیں۔ اب واٹس ایپ کا یہ نیا سکیورٹی فیچر خاص طور پر دوسرے ممالک میں رجسٹرڈ نمبرز کی فوری نشاندہی کرے گا، جس سے بین الاقوامی سطح پر ہونے والے آن لائن فراڈ کے واقعات میں نمایاں کمی متوقع ہے۔